* * *

Му вылас ӧд ӧтчыд олам.
Мыйла эськӧ татчӧ волам…
Мыйыс ставлы тані колӧ…
Коді кодысь эськӧ полӧ…

Му вылас ӧд ӧтчыд олам,
Коді кодысь эськӧ полӧ…
Уна нэм тыш-косьын коли,
Мир йылысь тай век на долям.

Му вылас кӧть ӧтчыд олам,
Олӧмыд тай курыд, сола.
Кодкӧ виньгыртӧ нэм чӧжыс,
Кодкӧ озырлун век чӧжӧ.

Му вылас кӧть ӧтчыд олам,
Мыйла ӧта-мӧдӧс ёрам…
Гӧльыс нэмсӧ ноксьӧ-ноксьӧ,
Озыр эмбур вӧсна шогсьӧ.

Му вылас ӧд ӧтчыд олам…
Гашкӧ, Енмысь ёна полам…
Муыс йӧзлӧн грекӧн тырис.
Енлы эскысьыс мӧй быри…

Му вылас ӧд ӧтчыд олам…
Кодлысь отсӧг бара корам…
Кор тай сьӧкыд, Енлы кевмам.
Сійӧ жӧ ӧд медся сьӧвма.

Гашкӧ, вочавидзас Енмыс…
Сылӧн шуӧм ставлы инмас…
Кор нин лоас бурыс-ладыс?
Му вылас кор бырас адыс?