* * *


Виччысьтӧг пӧ муслун волӧ,
Сьӧлӧм сотчӧ — би,
Кодлы  тэнад муслун колӧ,
Нюжӧдас пӧ ки.

Виччысьтӧг пӧ муслун волӧ,
Майшасян пӧ дыр,
Быттьӧ биын сотчан-олан,
Сьӧлӧм шудӧн тыр.

Виччысьтӧг пӧ муслун волӧ,
Сӧмын сійӧс тӧд,
Муслун дорйыны век колӧ,
Мед оз сюйсьы мӧд.

Виччысьтӧг пӧ муслун воас,
Шогсян вой и лун,
Узьтӧг кольлывлӧ пӧ войыс,
Мусукыд оз вун.

Виччысьтӧг ӧд муслун воис,
Ог тай эскы ме,
Мый нӧ мекӧд тайӧ лоис…
Сьӧлӧмын век тэ.

Виччысьтӧг ӧд муслун суис,
Шӧйӧвоши тай,
Шань-бур кадӧс тӧв ныр нуис,
Эз ло сыысь сай.

Отсав ӧні, мусук, меным,
Ланьтӧд сьӧлӧм би,
Ме ӧд кора ёна тэнӧ:
Нюжӧд мелань ки.