ДЗЕСКЫДІНЫН БЫТТЬӦ...


Быттьӧ ола дзескыдінын,
Кӧть и вӧльнӧй морт,
Югыдінын, шоныдінын —
Татшӧм менам горт.

Некытчӧ ог вермы петны,
Вошӧма морттуй.
Нимкодясьны вӧр-ва мичнас
Оз тай югды туй.

Быттьӧ ола томан сайын,
Абу ӧдзӧс тас,
Вермытӧмлы сьӧкыд тайӧ:
Он на пышйы тась.

Гӧсьтъясысь кӧть ми ог полӧй,
Волысьыс — морт-мӧд.
Кодлы нёрпалысьыд колӧ…
Бур на, быд лун пӧт.

Быттьӧ дзескыдінын ола,
Верӧсӧй — конвой,
Ӧта-мӧднымлы ми колам,
Кольтам лун и вой.

Ог ӧд дышав ёна эськӧ,
Век тай уджыс эм,
Став понда на сьӧлӧм пессьӧ,
Тӧждыс тырмӧ нэм.

Аслам позйын на ӧд ола,
Сьӧлӧмӧн ог усь,
Ныв ли внучка коркӧ волас —
Менам кык оз тусь.

Быттьӧ ола дзескыдінын,
Ывлаӧ он пет,
Енмӧй, меным югыдінын
Шудлунсӧ на сет.