ВИЧЧЫСЬӦМ


Кагаӧс виччысьӧ кынӧма ань —
Мусаник нывбаба, зэв на и шань.
Верӧскӧд олӧмыс аньлӧн эз ло:
Мӧд дорӧ мунӧма, бӧр, дерт, оз лок.
Кагаӧс виччысьӧ, абу на мам,
Ен вылӧ надейтчӧ: сетас вын-сям.
Чужас кӧть пи сылӧн, чужас кӧть ныв,
Шуас ӧд дзолюклы уна шань кыв.
Кадыс тай воис да чужис ӧд ныв,
Югдіс ӧд олӧмыс, сьӧлӧмыс — сыв.
Ань абу ӧтнас, кагук ӧд эм,
Мамукыд оз туськӧд зэв шуда нэм.
Аньыд ӧд дзолюксӧ виччысис дыр,
Нывбаба сьӧлӧмыд радлунӧн тыр.
Вӧвлӧм нин верӧсыс эз аддзы шуд,
Некоді сійӧс ас дорас оз кут,
Мӧд вылӧ ылавліс, олӧм эз ло,
Некодлы дышалысь верӧс оз ков.
Кагукӧс быдтысьӧ ӧтнасӧн ань,
Нылукыс сылӧн — мусаник, шань.