МИЧА ЗОН


Миян сиктӧ карысь воис
Статя, мичаник том зон.
Шумыд-гажыд мыйта лоис…
Нывъяслысь он тупкы вом.

Воӧм зонмыд вывті варов,
Вӧлӧма на ёна сюсь,
Корсьӧ аслыс зэв бур пара,
Юрыс яндзимла оз усь.

Ме вылӧ, дерт, оз и видзӧд,
Сылы колӧ мича ань,
Гашкӧ, сьӧлӧмас на сидзас,
Оз сюр сэтшӧм, коді шань.

Ветлӧ клубӧ шойччан рытӧ,
Да ӧд орччӧн век выль ныв.
Сӧмын меным шуштӧм сытӧг,
Сьӧлӧм дойӧй оз тай сыв.

Зонмыс вылӧ эн пӧ видзӧд,
Велӧдӧ нин менӧ мам,
Кӧть и сійӧ ёна мича,
Ньӧти абу сылӧн сям.

Татшӧмыдкӧд оз ло олӧм,
Зонмыс абу пӧ бур морт,
Сійӧ ӧти лунӧн олӧ,
Сійӧ — пӧртмасьысь лёк орт.

Менӧ зонмыс кӧть оз радейт,
Сійӧ меным сьӧлӧмвыв,
Со и век ме куті надей —
Лоа сылӧн муса ныв.

Миян сиктын олӧ-вылӧ
Ставлы тӧдса мича зон,
Ылӧдліс кӧть уна нылӧс,
Ме ог чинты ассьым дон.

А ме кута вӧлі лача,
Оз и вид на менӧ мам,
Зонсӧ велӧда ме ачым,
Татчӧ тырмӧ аслам сям.

Зонмыс — ӧні менам верӧс,
Ачым перйи аслым шуд,
Метӧг эськӧ мыйсӧ керис…
Оланінным — зарни куд.