ГАШКӦ МИЯН НИНОМ ЭЗ И ВӦВ


Миян муслун — нач нин мича мойд,
Бипур моз жӧ сьӧлӧмын ӧд ӧзйис.
Некор менӧ лӧг кывйӧн эн дойд.
Шаньсӧ-бурсӧ унакодь на вӧзйин.

		Гашкӧ миян нинӧм эз и вӧв,
		Тайӧ мойдсӧ лӧсьӧді ме ачым.
		Гашкӧ тэнӧ нуис тэрыб тӧв,
		Вылӧ-вылӧ енэжас тэ качин.

Лӧсьӧдны нин кӧсйим ӧтув поз,
Дасьтысим нин гажа кӧлысь кежлӧ,
Мыччан вӧлі меным льӧм пу роз,
Кӧсйысьӧмъяс некыдзи эг вежлӧ.

		Гашкӧ миян муслун эз и вӧв,
		Гашкӧ тэнӧ аддзылі ме вӧтын,
		Ылӧ тэнӧ нуис ышмӧм вӧв,
		Ассьыд шудтӧ аддзин, гашкӧ, сэтӧн.

Вӧлі муслун, кыдзи мича мойд,
Сӧмын сійӧ бипур моз жӧ кусі,
Лӧг кывъясӧн тэнӧ ме эг дойд,
Тэ ӧд меным век на, век на муса.

		Гашкӧ миян нинӧм эз и вӧв,
		Гашкӧ мойдсӧ лӧсьӧді ме ӧтнам,
		Ме ӧд тэкӧд мойдын эг ов  чӧв,
		Тӧждыси да майшаси тэ вӧсна.

Миян муслун — нач нин гажтӧм мойд,
Ёна шуштӧм тайӧ мойдлӧн помыс.
Бандзибӧдӧй киссьӧ синва войт,
Татшӧм лоис  муслуннымлы доныс.