ДАС КЫК ТӦЛЫСЬ


Тешкодь нима ӧшым
Мичмӧдӧма ӧшинь.
Тӧвшӧрыд эз ылав,
Сійӧс вӧтліс ылӧ.
Урасьӧм кор пуксис,
Тӧвшӧрыдкӧд юксис
Турӧбӧн, ён тӧлӧн,
Лоис сылӧн пӧлӧн.
Эшкын улын парма,
А вой тӧлыс ярмӧ.
Тайӧ кадыс — тӧв,
Кӧдзыд оз ов чӧв.

Кравзӧ-горзӧ рака:
Воис тулыс — рака,
Косму сійӧс вӧтліс,
Рака пӧ оз пӧтлы.
Но ӧд ода-кора
Космусьыд на гора,
Шоныд руӧн воис,
Гӧгӧр кӧйдыс койис.
Лэбач мыла сьылӧ,
Сьылан ылӧдз кылӧ.
Тулыс — шуда кад,
Дзоридзалӧ сад.

Лӧддза-номъя тӧлысь
Кӧсйис вӧчны кӧлысь,
Сора гажсӧ торкис,
Но и ачыс ворссис,
Моз на ладсӧ дзугис,
Гашкӧ, ачыс мудзис.
Петіс тшак да вотӧс,
Шонді пӧжӧ-сотӧ.
Тайӧ кадыс — гожӧм,
Ыджыдалӧ чожа.
Поводдя кӧ шань,
Радлӧ муса ань.

Уна рӧма кӧчыс
Эськӧ гажсӧ вӧчис,
Ӧдсӧ босьтіс йирым,
Лун и вой нин зэрӧ.
Сэсся ышмис вӧльгым,
Парма-вӧрыс гӧльмис,
Лоис пемыд, шуштӧм,
Вой тӧв ружтӧ-пушкӧ.
Мустӧм кадыс тайӧ,
Шонді кымӧр сайын.
Вой тӧлыс зэв яр,
Пуксьӧма сёр ар.

Дас кык тӧлысь волӧ,
Быдӧн ас пай олӧ,
Быдӧн уджсӧ вӧчӧ,
Оз кый куим кӧчӧс.
Кодкӧ мусӧ сотӧ,
Мӧд нин кӧдзыд лотӧ,
Кодкӧ кисьтӧ зэрӧн,
Няйтсӧ уна керӧ.
Тэрыб турӧб волас,
Олан ладсӧ сорас.
Став тӧлысьыс — ас,
Кольӧ ассьыс пас.