НЕКОР МОРТЛЫ ЛЁК ЭН ВӦЧ


Кодкӧ вежавидзысь, рам,
Сылы тырмӧ олан сям.

Кодкӧ уджач, ёна сюсь
Да и сьӧлӧмнас оз усь.

Кодкӧ мелі, авъя, шань,
Нач нин сійӧ ичӧт кань.

Кодкӧ идӧр да зэв зіль,
Синсӧ лун шӧрӧдз оз тіль.

Эм и сэтшӧм, коді дыш,
Уджын оз тай пӧсьӧд мыш.

Кодкӧ сяма, кодкӧ йӧй,
Кодкӧ збой, а кодкӧ вӧй,

Кодкӧ азым да на гусь,
Йӧзлы оз сет нянь ни тусь.

Кодкӧ мудер, нач нин руч,
Ылӧдас на тэнӧ-туч.

Кодсюрӧлӧн вомыс пась,
Ставӧс мустӧмтны век дась.

Кодкӧ ачыс быттьӧ пам,
Сыкӧд сёрни он на пан.

Ӧти вӧчӧ йӧзлы бур,
Мӧдсянь виччысь, мед оз пур.

Йӧзыд быдкутшӧмыс эм,
Тадзи вӧлі дзик быд нэм.

Сӧмын тӧдан али он:
Енмыс ставлы сетас дон.

Гашкӧ, абу на зэв сёр,
Сылысь прӧститӧм тэ кор,

Сэсся мортлы лёк эн вӧч.
Татшӧм шуӧмыс век стӧч.

Мирас абу гректӧм морт,
Но тэ ло, кыдз зэв шань ёрт.

Ен кӧ сетіс тэныд шуд.
Сылы аттьӧ таысь шу.

Ставсӧ аддзӧ-тӧдӧ Ен,
Сетас донсӧ тэд и мен.