КОЗЬНАВ МЕНЫМ...


Козьнав меным баба гожӧм,
Козьнав арся мича лун,
Козьнав бара шоныд гожӧм,
Коді некор мед оз вун.

Дыркодь виччыси ме тэнӧ,
Дзикӧдз вошис олан лад,
Гашкӧ, вунӧдін нин менӧ?
Вуніс миян арся сад?

Козьнав гажа шоныд гожӧм,
Сьыв мен мыла сьыланкыв,
Козьнав шань да шуда гожӧм,
Медым сьӧлӧм лоис сыв.

Миян садным шань да мича,
Тані сӧмын шуда ме,
Муслун сьӧлӧмын век видза,
Казьтылан-ӧ садсӧ тэ?

Козьнав бара баба гожӧм,
Сійӧ меным — нач бур вӧт,
Козьнав шондіа мен гожӧм,
Медым шогавны ог мӧд.

Кӧні ветлан, кытчӧ мунін?
Кытчӧ суис тэнӧ мог?
Али сьӧлӧмсьыд ме вуні?
Ме вӧсна тэ он нин шог…

Козьнав нӧшта баба гожӧм,
Медым бурдіс сьӧлӧм дой,
Виччыся ме баба гожӧм,
Таын кольӧ лун и вой.

Гашкӧ, муслун киссис-быри,
Кыдзи арся вижов кор…
Сьӧлӧм шогсьӧмӧн нин тыри…
Миян садйӧ воан кор?

Козьнав бара баба гожӧм,
Казьтам кольӧм оландыр,
Козьнав нӧшта баба гожӧм,
Миян садным гажӧн тыр.