ШУД ДА ШОГ


Шудыс бӧрйис зэв шань керка,
Сэні мӧдіс овны,
Тані — идӧрӧсь да пелькӧсь,
Лӧгысь оз ков повны.

Гозъя костын ӧзйӧ муслун,
Челядьыс зэв шаньӧсь,
Муслун биыс тан оз куслы,
Ӧтсӧгласыс — панас.

Шудыд мӧдъяс ордӧ муніс
Лӧсьӧдны бур олӧм,
Быттьӧ тӧдса керка вуніс,
Чайтіс: тадз и колӧ.

Со и воис татчӧ Шогыс,
Юасьтӧг и пырис,
Юр выв тыр нин лёкыс лоис,
Шогыд — зэв ӧд нырис.

Олан ладыд ӧдйӧ вошис,
Батьныс весиг юсис,
Мамныс дзикӧдз шӧйӧвошис,
Висьмис пи — оз тусьыс.

Да и муса, тӧлка нылыс
Кывзысьтӧмӧн лоис,
Асьсӧ ыджыдӧн нин кылӧ,
Мустӧм кывъяс койӧ.

Дзикӧдз пикӧ воӧм мамныс
Отсӧг Енлысь корӧ:
Мыйла вошис олан сямныс?
Коді овны сорӧ?

Дыркодь кевмис Енлы аньыд,
Шог-дойсӧ мед босьтас,
Енэжсаыд зэв кӧ шань ӧд,
Шогсӧ бӧр мед косьтас.

Ог тӧд, гашкӧ, Енмыс кыліс
Аньлысь кевмӧм-бӧрдӧм,
Шогыс ӧдйӧ быри-сылі,
Шудыс нин на ордын.

Батьныс сяммис, дугдіс юны,
Дзоньвидза и пиныс,
Нывлӧн ыдждалӧмыс вуніс,
Мамныс Шогысь мыніс.

Шогыс татысь ӧдйӧ муніс,
Мӧд оланін сюрис,
Сэні олан ладӧ суніс,
Вошис сэн став бурыс.

Ставлы бура тӧдны колӧ:
Шудыд сэтчӧ пырӧ,
Кӧні ӧтсӧгласа олӧм,
Кӧні сьӧлӧм сьылӧ.