ШУДЫД — СІЙӦ…


Шудыд — сійӧ лӧнь да рам,
Абу на и гора.
Сыын — муслун, олан сям.
Шаньлун шудтӧ дорӧ.

Шудыд — сійӧ лӧнь да рам,
Топыд киын видзан.
Корсюрӧ и майшасян,
Ловъяд лёк кӧ сидзӧ.

Шудыд — сійӧ кӧть и рам,
Лёксьыс век жӧ вешйӧ,
Завидьтысьыс нач нин пам,
Лӧглунсьыс на пессьӧ.

Шудыд — сійӧ кӧть и рам,
Йӧз синмысь он сайӧд.
Ныв-пи вӧсна радлӧ мам,
Авъяӧсь кор найӧ.

Мамлӧн шудыс — сьӧвма ныв.
Батьлӧн — тӧлка пиыс,
Ай-мамыдлӧн — небыд кыв,
Челядьлӧн — шань киыс.

Шудыд — сійӧ лӧнь да рам,
Ӧтув позйын кургӧ,
Шудын муслуныд оз ям,
Кань моз сійӧ мургӧ.

Шудыд — сійӧ кӧть и лӧнь,
Дорйысьнытӧ кужӧ,
Муслун — ю кодь эзысь вӧнь —
Вына сьӧлӧм уджӧн.