КУИМ МИЛЬЯРД


Ёртӧй!
Тэ кылан
Мӧд пятилеткалысь сьылӧм?
Кылан, кыдз гор шыыс сылӧн
Сьӧлӧмтӧ кыпӧдӧ вылӧ?
Тӧдан тэ,
Тайӧ ӧд абу нин важ,
Абу «Великӧй Россия»,
Тайӧ ӧд —
Социализм тэчан марш,
Тайӧ — ударнӧй удж миян.
Миян победалӧн гимн —
Мир вежан гым.

–––––––––

Кор му шарсӧ зымгис
Октябрлӧн гым-чард,
Россияын вын кутӧм лӧсьӧдім выльӧс, —
Сэк босьтлім ми сылысь
«Наследство» — лёк мыльӧс:
Разруха
Да уджйӧзъяс — уна мильярд.


Кор киссьӧм «усадьба»
Ми дзоньтавны босьтчим,
Кор чукӧртны кутім
Сӧветскӧй казна, —
Сэк мувывса понъяслӧн
Пеж горшныс воссис —
Пыр лэптісны
Миянӧс пурны война.
Ми ас вынӧн вермим
Став кыпӧдчысь мирсӧ,
Эз дор рабство чепъясӧн
Миянӧс враг;
А кымын мильонъясӧн
Войтырсӧ чирсіс?
А овмӧс убыткаыс —
Кымын мильярд!
Кӧть босьтіс победа
Октябрь революция,
Кӧть перйим ми аслыным
Слава да честь, —
Эг пуктӧ Версальын моз
Ми контрибуция,
Эг босьтӧ аннексия
Ни ӧти весьт.


Кор шыасьлім
Восстановительнӧй кадын
Ми удждысьны, —
Йӧртіс, дерт, эралысь гад:
Кредит пыдди
Грӧзитліс нырны снарядӧн,
Кредит пыдди
Вӧзйыліс миянлы яд.


Кор кутчысим кыпӧдны
Выль индустрия, —
Эз сет некод
Стерлинг ни, доллар ни, франк;
Сэк энтузиазм миян
Ӧзйис выль биӧн —
Ми ассьыным пуктім сэк
Первой мильярд.


Сідз водзӧ да водзӧ
Пыр асланым вынӧн
Ми вежим Россиялысь
Сьӧд чужӧмбан.
Ми капиталистъясӧн йӧртӧмысь мынім,
Кор нёль воӧн эштӧдім
Вит вося план.


Став мир водзын
Уджнаным ошйысьны вермам:
«Да! Социализмлӧн ми —
Авангард!»
Страналы ми асьным
Победасӧ перъям —
Пятилеткаын сетім нин
Квайт мильярд.


Ми сы вылӧ стрӧитім
Гырысь заводъяс,
И на пиын гордостьяс —
Магнитогорск, Днепрогэс.
Эз отсасьны тані
Кыз кымӧса лордъяс,
А дугдывтӧг путшкисны
Шыркнитан гез.


А ӧні ми
Некор ог копыртчӧй налы,
Лёк кӧртӧдӧн миянӧс
Некод оз гарт;
Ми асланым
Ыджыд Сӧветскӧй страналы
Пыр дасьӧсь и водзӧ на сетны
Не ӧти мильярд!


Оз лысьт
Большевикъяслысь артавны ӧдсӧ
Гырд бугыля
Лӧгалысь капиталист:
Ӧд миянлы
Кризис ни пик абу тӧдса,
А сылӧн страна пасьта
Ымзӧм да свист.


Кӧть сьӧлӧмыс враглӧн
Оз веськавлы инас,
Но миянӧс
Оз нин йӧрт некутшӧм гад:
Ми асьным нин вӧчам
Быд сложнӧй машина,
Завод,
И быд фабрик,
И быд агрегат.


Мед ӧдйӧджык классъястӧм общество тэчны,
Рабочӧйяс корисны выль заём лэдзны.
Дерт, та вылӧ ӧтказӧн некод оз варт —
И таво жӧ сетам страналы ми
Куим мильярд!


Ме надейтча,
Кылас кывбур — агитация,
Дай чукӧстчӧм менам
Оз весьшӧрӧ пет:
Мед «Мӧд пятилетка» — заём облигация
Быд морт ордын вӧлі кыдз рапорт-билет!
Сэн вынсялӧ
Социализмлӧн отряд,
Сэн ӧзъялӧ
Ленинлӧн чукӧртӧм арт,
И сы вӧсна сетам ми
Куим мильярд!


Ёртӧй! Тэ кылан
Мӧд пятилеткалысь сьылӧм?
Кылан, кыдз гор шыыс сылӧн
Сьӧлӧмтӧ кыпӧдӧ вылӧ?