ИНАЛАМ СТАВ ВӦР
(Кылӧдчан оратория)


Тэныд,
Коді муркӧдчис тӧвбыд вӧр-ягын,
Коді водзмӧстчӧ кылӧдчан кадын,
Тэныд ми висьталам татӧн
Боевӧй чуксасян кыв!
Тэныд,
Коді муралан кадын
Мунӧ медводдза радын,
Тэныд, ударнӧй бригада!
Боевӧй чуксасян кыв!
Кывзылӧй ті!
Видзӧдлӧй ті!
Квайтӧд му юкӧнас
Быдмӧ выль мир,
Сійӧ — миян Сӧветскӧй Союз:
Вир-яйыс — би пытшкын чужліс,
Арлыдыс — дзордзалан тулыс,
Чужӧмыс — ӧзъян гӧрд флаг,
Пӧраыс — мир вежсян кад!
Сойясыс — мӧлӧт да чарла,
Воськолыс — ёнтӧ му шарлы,
Вынйӧрыс — ӧтувъя вемын,
Сьӧлӧмыс — куслытӧм Ленин!
Большевикъяслысь ӧдъяссӧ
Некод оз надзмӧд,
Налысь вынйӧр эз тӧдмавлы
Некутшӧм нэм;
Большевикъяс кӧ шуасны:
— Вӧчамӧй тадзи! —
Сэки веськыда гӧгӧрво:
— Сійӧ нин эм!
Со кутшӧм миян страна —
Эс-Эс-Эс-эР! —
Олӧм бергӧдны мирлы пример!
Став страна пасьта кылӧ
Гора гӧлӧса сьылӧм:
Унджык из шом!
Унджык нефть!
Чугун да сталь, да кӧрт!
Машина унджык пет!
Электроток!
Унджык хлопок!
Унджык вӧр!
Ӧдъяс чинтӧм оз ло!
Уджысь повзьӧм оз ло!
Вит пыдди — нёль!
Вит пыдди — нёль!
Эй, тӧварыш, эн коль!
Эн торкав лад,
Тшӧтш сьывны куж!
Ударнӧй кад —
Ударнӧй удж!

Сьылӧм («Марш ударников» Бела Рейниц ногӧн).

Из гӧра чашйӧ, жуглӧ
Ударнӧй удж.
Гӧрд сьыланкывйӧн жургӧ
Ударнӧй удж.
Удж миян — доблесьт и почёт,
Быд шахта, фабрик и завод,
Вӧр яг, колхоз, быд кар, быд сикт
И трактор гор,
Пыр сьылӧ ставыс ӧтитор:

Припев.

Плантӧ тырт!
Плантӧ тырт!
Программа Ленин ёртлысь тырт!
Быд лун, быд час план тырт!


Видзӧдлӧй ті!
Видзӧдлӧй збоя
Асылӧ, рытылӧ, лунӧ и войӧ!
Быдлаын сувтӧны — пырӧны стройӧ
Выль гырысь гигантъяс —
Уджалысь класслӧн дзирдалан пасъяс:
Уна сюрс вына Днепростройяс,
Магнитогорскъяс,
Урало-Кузбассъяс,
Турксибъяс, нефтепроводъяс,
Автозаводъяс, трактор заводъяс.
Татшӧм гигантъяссӧ вӧчисны
Кодъяс?
Татшӧм гигантъяссӧ стрӧитім
Ми!
Асланым тані удж ногъяс!
Кӧсйисны кӧртавны миянлысь ки
Капиталистъяс,
Банкиръяс, милордъяс, —
Эз вермыны! Некор оз вермыны!
Эг йӧрмӧй ми! Некор ог йӧрмӧй ми!
Регыд нин на улысь дзикӧдз ми мынам,
Сы вылӧ подулыс дась нин,
Быдтор ми стрӧитам асьным,
Коллектив вӧляӧн,
Коллектив вынӧн!
Со кутшӧм миян страна —
Эс-Эс-Эс-эР! —
Рабствоысь мездысьны мирлы пример!
Некодысь бӧрӧ оз коль!
Вит пыдди — нёль!
Вит пыдди — нёль!

Сьылӧм (воддза моз жӧ):

Быд Днепростройлӧн выныс —
Ударнӧй удж!
Быд выль гигантлӧн тшыныс —
Ударнӧй удж!
Буржуй пыр пӧльтӧ выль война —
Спокой оз сет Сӧвет страна,
Но миян сталь, из шом и вӧр
Оз врагӧс лэдз!
Сӧветскӧй му вылӧ оз лэдз!

Припев.

Чорзьӧд вын!
Чорзьӧд вын!
Винтовка киысь мед оз мын!
Быд лун, быд час оз мын!


Нэмын вӧвлытӧм ӧдъясӧн
Дорам выль строй.
Уджӧ кыпӧдӧ сьӧлӧмным,
Зэвтчӧма сой.
Быд уджын перъям
Быдсяма тыр вермӧм!
Ордйысьӧм,
Бригада,
Буксир! —
Со миян удж вывса знамя!
Сы улын тыртам ми планъяс,
Сы улын мирсӧ ми панъям!
Чардалан кадын
Гымалӧ шаг,
Ылын и матын
Тіралӧ враг!

Сьылӧм (сідз жӧ):

Пятилетка таво тыртам —
Ударнӧй удж!
Мӧд пятилетка тыртам —
Ударнӧй удж!
Мед чорзяс, ёнмас мунан туй,
Оз лысьт мед воны лёк буржуй!

Припев.

Содты ӧд,
Содты ӧд!
Тэ индӧд партиялысь тӧд!
Быд лун, быд час тэ тӧд!


Видзӧдлӧй ті!
Видзӧдлӧй, вайӧ,
Войвыв крайӧ!
Войвылын медыджыд озырлун —
Вӧр!
Войвывлы партиялӧн лозунгыс —
Вӧр!
«Вӧр вӧсна тыш —
Социализм вӧсна тыш!»
Кывзы, вӧр фронтвывса армия!
Виччысьӧ миянсянь партия,
Виччысьӧ миян правительство,
Некутшӧм бок мед эз вӧр,
Уджыс мед оръявтӧг муніс быд час, —
Виччысьӧ быдмысь страна
Миянсянь
Вӧр!
Быдласянь чуксасьӧм кылам:
«Эй, паськыд Войвыв край, кылан?
Зільджыка вӧр!
Ысты, вай, вӧр!
Ӧдйӧджык планнымӧс олӧмӧ пӧртам!
Вӧртӧг тэ уджнымӧс торкан,
Миянӧс падмӧдан, йӧртан!
Тырмымӧн ысты, вай, вӧртӧ!»
Сідзкӧ ми, ёртъяс,
Ставным вӧр фронтас
Медбӧръя штурм вылӧ петам!
Кылӧдчан удж вылын перъям победа!
Тӧвбыдӧн вӧрсӧ мый лэдзим —
Ставсӧ страналы ми сетам!
Кылӧдтӧг вӧрыс оз коль!

Сьылӧм (воддза ногӧн жӧ):

Вӧр ягын тӧвбыд кылім
Ударнӧй удж!
А тулыс — юяс вылын
Ударнӧй удж!
Вай, ёртӧй, тэрмась, кадыс скӧр,
Ударнӧй ӧдӧн кылӧд вӧр —
Лотовка, пур, кӧть ӧтка моль!
Эн косӧ коль!
Ни ӧти кер эн косӧ коль!

Припев.

Ставсӧ ну!
Ставсӧ ну!
Программа партиялысь ну!
Быд лун, быд час, вай, ну!


Быд лэдзӧм кер вӧсна
Тшӧктӧ тэд вермасьны
Боевӧй кад!
Быд косьмӧм кер вылӧ
Нимкодя жеръялӧ
Классӧвӧй враг!
Быд кольӧм керйыд
Чуктӧдӧ-перйӧ
Асланым стенысь кирпич.
Петкӧдлы уджын ударнӧй пример!
Срок кежлӧ местаӧдз инав быд кер!
Кольӧмысь, косьмӧмысь видз!
Кӧсйысям уджавны сідз!
Тӧданныд ті,
Вӧр миян —
Быдӧнлы дона!
Вӧр миян —
Зарни валюта!
Буржуй кӧть лӧгалӧ ёна,
Миянӧс нӧйтны пыр пеж киыс лудӧ, —
Сӧмын и сійӧ оз ов миян вӧртӧг —
Вӧр вылӧ миянлы вайӧ
Гырысь да колан машина.
Регыд нин разьсяс и тайӧ лёк кӧртӧд —
Сійӧс ми синам
Асланым техника вынӧн!
Дзикӧдз буржуйсянь зависимосьт мынӧ!
Кылан тэ!
Кылан, вӧр кылӧдысь!
Горӧд, мед потласьӧ сынӧдыс:
«Лозунгным:
Вит пыдди — нёль! —
Олӧмӧ пӧрттӧм оз коль!
Ӧтувъя вынйӧра сойясӧн
Туй вылысь пыкӧдъяс зырам!
Социализм тэчысь геройясӧн
Мӧд пятилеткаӧ пырам!

Сьылӧм («Кылӧдчан сьыланкыв» ногӧн):

Му шар пасьта уджным юргӧ —
Долыд, вӧльнӧй удж!
Эк, буржуй, эн китӧ чургӧд —
Миянӧс он судз!
Кӧть тэ ещӧ скӧрмы —
Миян вӧр оз йӧрмы!
Боевӧй мог миян татшӧм —
Кылӧдам став вӧр!
Чергӧдам став врагсӧ гатшӧн —
Мед оз чеччы бӧр!
Жугӧдам вӧр валйӧн,
Гырысь керйӧн-шпалйӧн!