ВӦР ВӦСНА


Кывзӧй ті,
Вӧр лэдзысьяс,
Колхозникъяс,
Уджалысь йӧз,
Код выль олӧм стрӧитысь радын
Тшӧтш вынйӧрсӧ йитӧмӧн гыпкӧ,
Победаысь нимкодя кодлӧн
Пым сьӧлӧмыс тіпкӧ.
Кывзӧй, мед юр вемӧ сутшӧ,
В.К.П-лӧн Войвывлы лозунг,
Код ӧзтӧмӧн чуксалӧ
Зэв ыджыд уджӧ:
Вӧр вӧсна тыш —
Социализм вӧсна тыш!
Эг ӧмӧй ми сійӧ
Колян во тӧлын,
Кор удж вылӧ сӧлім,
Быд враглысь кор чегъялім ружсӧ,
Бригадаясӧн песовтім
Кулакъяслысь вужсӧ, —
Эг ӧмӧй ми сійӧ
Мӧймуся вӧр лэдзан воӧ
Медводдза почётнӧй местаӧ воӧ?
Ми! Сійӧ — зільлун миян,
Уджалысь коми войтырлӧн,
Сійӧ миян,
Большевикъяслӧн, чер да пила,
Сійӧ миян,
Уклад йитӧда котырлӧн —
Сюрс ударнӧй бригадалӧн сила
Вайӧдісны
Ыджыд победаӧ вӧр лэдзан фронтын.
Сувтім странаын
Срок воан кадӧ
Медводдза
Почётнӧй
Радӧ!

Сьылӧм.

Ми ӧтувъя бригадаӧн,
Сквознӧйӧн да ударнӧйӧн,
Выль Войвыв вӧсна дугдывтӧг
Пыр нуӧдам ён тыш.
Ми сьӧлӧмсяньным кӧсйысям
Компартиялысь вӧзйӧмсӧ
Срок кежлӧ тыртны содтӧдӧн,
Удж личӧдӧм оз ло!
Мед вӧтчисны тшӧтш ёртъясным,
Ми лэптам вӧрын ордйысьӧм, —
Эк, вӧрын мырсьысь армия,
Тэ звучникысь эн коль.

1-ой.

Сулав!
Код тайӧ туй шӧрӧ миянлы
Кулаклысь лэчьяссӧ сиавлӧ?
Коді нӧ эстӧн, со, пельӧсас вашкӧ,
Лёкысла пиньяссӧ йирӧмӧн кашкӧ?
Код тшӧктӧ струментъяс жуглыны тані,
Ышӧдӧ лэптысьны ордйысьӧмлы паныд?
Тайӧ кулак али отсасьысь сылӧн?

Ставныс.

Эй тэ, враг! Видзчысь тэ, вешйы сэсь пеж!
Миян туй вылысь ылӧджык кеж!
Кылан тэ, дерт, быттьӧ ныриса пон,
Пятилетка тэд лӧсьӧдӧ медбӧръя пом.

2-ӧд.

Сулав!
Код сэн враг пӧлян улӧ сьылӧ?
Коді нӧ вӧр фронтсӧ эновтны тшӧктӧ?
Код сэні дзескыдӧн ылӧдчӧ кылӧ,
Кулаккӧд воча кок вежнясьӧ-йӧктӧ?

Ставныс.

Дугды тэ, весьшӧрӧ вынтӧ эн пес!
Тіянлысь, гадъяслысь, тӧдам лёк мӧвп.
Войдӧр нин ёна ті зэвтлінныд вез.
Весась, шӧть!
Ныр-вомтӧ разям, мед некор эн лӧвт.

3-ӧд.

Сулав!
Коді нӧ войяснас шыш моз сэн шӧйтӧ?
Код сідзи пышъялӧ, дзебсьӧмӧн олӧ,
Миянлы син водзӧ сувтны оз лысьт?
Код сійӧ кӧч моз пыр тіралӧ, полӧ?
Мый нӧ тэ, удж кӧсъян орӧдны? Брысь!

Ставныс.

Эн вунӧд —
Пятилетка тыртысьяс ярӧсь да ёнӧсь,
Налӧн зарядъясыс чорыдӧсь, донӧсь.
Тӧд, вредитель. Ми веськыда вишкам,
Ті вокӧс ас туйысь жалиттӧг чышкам.

4-ӧд.

Сулав!
Коді нӧ эсійӧ шлынкъялӧ-шӧйтӧ,
Уджтӧм моз кияснас тшапа зэв ӧвтӧ?
Абу-ӧ тэ тайӧ, важ тӧдса сват —
Администратор-бюрократ?
Ачыд, со, ни чӧрта тӧлкӧн он вӧч,
Вӧр лэдзысьясӧс эновтін прӧч,
Водзмӧстчан уджӧн бур веськӧдлӧм абу,
Ударничество, ордйысьӧм мунӧ зэв слаба,
Некутшӧм индӧдъяс олӧмӧ некор он пӧрт.

Ставныс.

Эн вунӧд тэ веськӧдлан удж могтӧ тась,
Мед пыр вӧлін уджалан фронт вылын дась!
Эн артмӧд прорывъяс, а лоас кӧ — бырӧд,
Мед вӧлін тэ уджвывса збой командирӧн!

5-ӧд.

Сулав!
А тайӧ нӧ коді сэн куйлӧ,
Со, жняпвидзӧ уджалан кадӧ?
Муртса кӧ бергӧдчан — баракӧ шуньгӧ,
Сэн сэсся валяйтчӧ вывланьӧ задӧн.

Ставныс.

Ті весасьӧй, дышъяс да лодыръяс!
Ми уджалам дружнӧй зіль котырӧн.
Код уджавтӧг виччысьӧ дась нянь да сов,
Мед миянкӧд ӧтлаын сійӧ эз ов!

Сьылӧм.

Ту-ру-ру — вӧр фронт вылын прӧверка,
Ту-ру-ру — ми арталам сэн удж.
Кеж, долой, — удж орӧдны код жергӧ,
Оз вунӧд мед — ми бертовтам лёк вуж!
Ту-ру-ру — ми вӧрын зарни лэдзам,
Ту-ру-ру — зэв топыд миян рад.
Выль Войвыв тшӧтш ми зіля тані тэчам, —
Эк, веськыд туй дай зумыд миян шаг!
Ми сетамӧй став выннымӧс вӧр фронтлы, —
Сідз тшӧктӧ кыптан кадӧ ВКП.