КОДЛЫ ОВНЫ ӦНІ ДОЛЫДТерень Ӧльӧ, Савӧ Пиля, Игӧ Ёгор, Альӧ Илля, Татьӧ Педьӧ, Мирон Миш, Катьӧ Васьӧ, Якӧ Гриш, Ещӧ морт-мӧд, ставныс коми, Чукӧртчӧмась исполкомӧ, Арталӧны оланног: Кодлы долыд, кодлы шог. Бура дыр нин вензьӧм мунӧ, Ызгӧм содӧ, сёрни уна: «Со кыдз!..» «Та кыдз!..» «Абу...» «Но?..» Нинӧмтор он гӧгӧрво. Терень Ӧльӧ сэки чеччис, Ыджыд гӧлӧс сэтчӧ лэптіс: «Ланьтлӧй! Тадзи тӧлк оз босьт — Регыд артмас миян кось! Ми кӧ изны пондам тадзи — Делӧ мунны кутас надзӧн, Сӧмын лыбас зык да шум. Менам со эм кутшӧм дум: Тӧлкыд зыкӧн оз ло ньӧти; Висьталӧй вай кодкӧ ӧти. Ставныс кывзӧны сэк мед, Сэсся сы бӧрын и мӧд. Медвойдӧр, дась сувтӧм вылысь, Кыв-мӧд шуа ме та йылысь, Кодлы долыд либӧ шог Сетӧ тайӧ оланног. Коркӧ квайт во старшинавлі, Быд ног мырси крестьяналы, Тӧдӧ этша менам юр, Кыті омӧль, кыті бур. Крестьяналы, дерт, медсьӧкыд, Суис миянӧс лёк рӧкыд: Кыськӧ лои Сӧвет власьт — Ставсӧ сылы ӧні дасьт! Сизим во чӧж йӧзӧс чирсіс, Эмбур пасьйис, быд ног чирзіс: «Тайӧ вай да мӧдтор вай... Он кӧ сет, мун релльӧ кай!» Кужӧ босьтны колӧ мыйӧн: Няньӧн, колькйӧн, яйӧн, выйӧн! Ӧні сьӧмӧн тыртӧ зеп — Лӧсьӧдӧма сэтшӧм НЭП!.. Быдтор нуӧ — оз сет нинӧм, Аслас вӧлі пӧт мед кынӧм! Весиг россьыд босьтӧ сьӧм, Регыд колям гач ни кӧм! Тадзнад овны, — ставныд кылад, — Сӧвет власьтлы медся гылыд! Дыр-ӧ олас, ме ог тӧд... Сэсся висьталас мед мӧд». Ӧльӧ бӧрын сувтіс Пиля, Кутіс висьтавны зэв зіля: «Абу сідзи, Ӧльӧ ёрт! Сӧвет власьтыд абу морт. Абу сылӧн вом ни кынӧм, Оз сёй ачыс сійӧ нинӧм. Служащӧйыс — лыд ни тшӧт: Со мед вӧлі коді пӧт! Продналогыд крестьяналӧн Ставнас пырӧ горшас налы: Нянь и, кольк и, вый и яй, — Ставсӧ крестьянаыд вай! Жалӧванньӧ налӧн гырысь, Олӧны дзик сьылӧмпырысь... Со кӧн долыдлуныс, шу! Сэсся нинӧм ме ог шу». «Дзикӧдз сьӧлӧм менам пуӧ! — Игӧ Ёгор сэтчӧ шуӧ. — Некод весиг эз шу кыв, Кыдзи олӧ ператив! Мыйла нӧ ті сійӧс коляд? Сылы овны медся долыд! Служащӧй да Сӧвет власьт Оз на тӧдны сэтшӧм «масьт». Перативыд тӧвар вылӧ Донсӧ пуктӧ вылысь вылӧ. Быдтор вылӧ корӧ нянь — Деньга вылӧ оз сюр пань! Миян гӧрбӧн госсӧ чӧжӧ! Тӧвар донсӧ быд лун вежӧ: Совлӧн талун нёльсё дон, Аски сылӧн — миллион! Со меддолыд кодлы овны: Мый окота, сійӧ-й новлы, Лов мый лэптӧ — ю да сёй, — Уджла, майбыр, оз вись сой!» Илля висьтавны сэк мӧдіс: «Ті тай нинӧм на он тӧдӧ! Ачыс тӧварыд оз чуж. Корсьны колӧ сылысь вуж. Эмӧсь рабочӧйяс миян, Власьтыд ӧні найӧ киын; Уджалӧны сизим час — Сёйны-юны — ставыс дась! Мыйда тӧвар ӧні петӧ, Власьтыд ставсӧ налы сетӧ: Оз сюй некутшӧм налог, Абу-й налы овны шог! Лишалӧ мый, — абу-й дивӧ! — Вузалӧны перативӧ. Вай жӧ крестьяниныд кор: Оз на вичмы нинӧмтор. Сідз, ме ногӧн, лоны колӧ: Рабочӧй медбура олӧ. Сійӧ сьӧкыд удж оз тӧд, Сылӧн кынӧмыс пыр пӧт!» Татьӧ Педьӧ ӧдйӧ чеччӧ, Сьӧд тош кузя-с дулльыс лэччӧ. Мыйкӧ бызгис бура дыр, Юрӧ нинӧмтор эз пыр. Ӧтарӧ пыр — булы-болы! Эз и висьтав, кодлы долыд, Сӧмын шуис: «Мыжа тан Пролетария сек стран!» «Но лешакӧ, кывйӧй луддзис, Пельяс сьӧдмис, ачым мудзи: Висьтавныныд абу-й дыш? — Горӧдіс сэн Мирон Миш. — Дыр нин мургам, ме зэв шензя: Мыйысь тадзи ставным вензям? Пыр кӧть сэсся тані сьыв, Оз шу некод веськыд кыв! Кывзӧй менсьым, кодлы колӧ: Меддолыда ӧні олӧ, Тӧдад коді? — Коммунист! Со и ставыс менам висьт!» Ставыс сэки шай-паймуні: «Но, сё морӧ! Кыдз нӧ вуні? Аттӧ дивӧ! Збыль ӧд сідз, Микайлӧ Миронӧвич! Найӧ йӧзтӧ-й топӧдӧны, Кысь мый сюрӧ тяпкӧдӧны! Аддзим вӧлись, сё ей бог, Кодлы долыд оланног!» «Ланьтӧй! Прӧстӧй нимкодясьӧм!» — Горӧдіс сэн Катьӧ Васьӧ. — Каммунистыд абу сар, Эм сы вылын камиссар! Сійӧ быдӧн вылын юра, Сійӧ олӧ медся бура, Пырны сы дінӧ он письт, Сійӧ — медлёк камунист!» Ызгӧм бара тані содіс, Он и тӧд, мый шуӧ коді, — Тайӧ ставсӧ ме ог гиж. Часлы, сувтіс Якӧ Гриш. «Ӧні позьӧ шуны-й меным. Ме ногӧн кӧ, другъяс, Ленин Олӧ, кыдзи овліс сар, Сійӧ медъён камиссар! Ставыс сійӧ кипод улын, Быдтор инӧ, мый оз шулы. Сэтшӧм морт пӧ оз нин чуж... (Ставсӧ висьтавны ог куж). Мый нӧ ещӧ сэсся колӧ? Ӧні тӧдад, кодлы долыд? Ленин — ставыс вылын юр. Сылы-й долыд, сылы-й бур!» Дыр сэн сэсся мӧвпалісны, Уна ногӧн арталісны; Быд морт ас кыв вылас рад, Кодлы ӧні долыд кад. «Сӧвет власьтлы! — Ӧльӧ шуӧ. «Служащӧйлы!» — Пиля нуӧ. «Перативлы!» — быттьӧ би Ӧзйӧ сэтчӧ Игӧ пи. «Робочӧйлы!» — Илля кыскӧ, Педьӧ тшӧтш жӧ мыйкӧ ызгӧ. «Камунистлы!» — содтӧ Миш, «Ленинлы, зон!» — горзӧ Гриш. Асьныс ставныс ызгысь рӧдысь, Кольччӧм абу мӧда мӧдысь, Зык пыр содӧ — веськыд мат! Лэдзисны нин гоз-мӧд «мать». Бӧрйысьӧм сэк кутіс мунны, Кодлы долыд Коми муын. Ӧти шуис: «Серегов!» Кодкӧ лэптіс: «Вешняков!».. Ӧльӧ пызанӧ друг кучкис: «Ланьтлӧй! Колӧ вӧчны лючки, — Тӧлкыд миян тадз оз мун, Прӧста вошӧ сӧмын лун! Кодлы долыд, тӧдны колӧ, — Тадзнад помӧдз огӧ-й волӧ. Сӧвет власьтлы, шуа тай, Ӧні овны веськыд рай!..» «Мыйла асланьыд тэ тілян? — Ӧзйис сэтчӧ Савӧ Пиля. — Служащӧйлы ӧмӧй шог? Со кӧн долыд оланног». Бара мӧдіс налӧн зыксьӧм, Мӧда-мӧдкӧд венӧн пыксьӧм: Исполкомын юр-юр-юр! «Со, ме шуа, кодлы бур!» Дзикӧдз эськӧ воши луныс, Дыр на эськӧ вензьӧм муніс, Быдӧн кыскис аслыс ныр, — Тӧдтӧм морт кӧ сэк эз пыр. «Олад-вылад! — сійӧ шуис, — Мыйысь мунӧ тіян шумыс? Ывла вылӧдз кылӧ зык. Висьталӧй жӧ, кутшӧм пик? Ӧтвылысь ми, гашкӧ, тані Кыдзкӧ-мыйкӧ решитамӧ? Эм ӧд уна тӧдтӧмтор, Уна-йсь овлӧ прӧстӧй спор». Кодкӧ шуис: «Вай нӧ висьтав. Асьным эгӧ некыдз письтӧ. Тэӧдз сідзкӧ ӧні мог: Кодлы долыд оланног?» «Сӧвет власьтлы медбур вӧля!» — Шуис бара Терень Ӧльӧ. Пиля сувтіс быттьӧ тшӧть: «Служащӧйлы!» — шуис тшӧтш. Ёгор горзӧ: «Перативлы!» Уна пӧлӧс гӧлӧс кывлӧ. Бара лыбис чорыд вен — Брунакылӧ керка стен. Коркӧ дырӧн бара выльысь Висьталісны вензьӧм йылысь. Кывзіс тӧдтӧм морт зэв дыр, Гӧгӧрвоис ставсӧ пыр. «Сідзи-й чайтлі, мися, прӧста Вензьӧм мунӧ тіян костын. Весьшӧрӧ дзик тані шум — Асланыд тан тӧдтӧмлун...» Торкис сэні Терень Ӧльӧ: «Тэ кӧ сюсьджык, — шуӧ, — бӧльӧ, Миянлы вай инды туй, Бурджык вежӧр юрӧ сюй! Менӧ йӧйӧн он-ӧ чайт тэ? Старшинаын овлі квайт во — Мыйкӧ менам этан эм! (Аслас плешӧ котшкис сэн.) Тадзи сёрнитны, зон, дугды! Пемыдӧсь кӧ — вот и югдӧд! Висьтав вай тэ регыдджык, Кодлы овныс долыдджык?» «Сідзкӧ кывзӧй, — шуӧ мортыд, — Энӧ сӧмын менӧ торкӧй. Мыйӧн висьтлы воас пом, Сэки ачым тупка вом». Висьтавны кор мортыд мӧдіс, Йӧзыд выльтор уна тӧдіс: Ставныс паськӧдӧмась вом, Быдӧн шензьӧ: «Аттӧ, зон!» «Ӧні, ёртъяс, шуны колӧ, Вывті сэтшӧм кокньыд олӧм Миян ӧні эз на ло — Война муніс сизим во. Война вӧлі кодлы гажӧн, — Тӧданныд, дерт, ставныд важӧн: Буржуйяслӧн сэні мыж, Лэчтӧны на-й ӧнӧдз гыж. Эз кӧ эськӧ война-с лолы, Зэв нин эськӧ вӧлі долыд, Эськӧ важӧн шы ни тӧв, Эз и сёрни ӧні вӧв! Сӧвет власьт пӧ, кодкӧ шуӧ, Крестьяналысь быдтор нуӧ... Гӧгӧрвоад жӧ ӧд ті: Сӧвет власьтыс — ставным ми! Ленинӧс дзик сарӧс пыдди Кодкӧ вӧлі тані лыддьӧ. Сійӧ миян кодь жӧ ёрт, Став йӧз пытшкысь бӧрйӧм морт». Дыр на тадзи быдтор йылысь Висьтавліс дзик рытъявылӧдз: Мыйла НЭП да продналог, Мыйла сьӧкыд оланног. Некод эз сет долыд олӧм, Сійӧс аслыд вӧчны колӧ; Некод весьшӧрӧ оз ов — Видны некодӧс оз ков! Крестьяналӧн робочӧйкӧд Пыр мед вӧлі топыд кӧртӧд! Кодыр лоӧ ӧткодь дум, — Сэки-й пуксяс долыдлун!
