КОМИ МУ — АССР


Важ нэмъясӧ вӧвлім ми
«чудьясӧн», рабъясӧн,
И сарскӧй сьӧд тюрьмаӧн
зумвидзліс муным.
Ок, сьӧкыд и казьтывныс
кольӧм лёк кадъяссӧ! —
Ӧд сир курыд олӧм пыр
таджъясим-мунім.

Ми кык вевса нарт улын
майшасьлім, виньгыртім.
Дзик лыжавтӧдз уджавлім,
шойччӧг эг тӧдлӧй.
Заводъясӧ дадьясӧн
кымын туй тінгыртлім,
А кымынӧс Сибырӧ
тшыглуныд вӧтліс!..

Сортовкаяс гуджгавлім,
кыйсьывлім, вӧравлім,
Но прӧмыссӧ миянлысь
озыр пыр мырддис.
Кӧть видз-мутӧ уджавлім,
тылаяс керавлім,
Но кушман да тшак вӧвлі
вӧлӧга пыдди.

Тшыг кадъясӧ «шмонитлім» —
асьнымӧс ылӧдлім:
«Зырянское горло пӧ
всё мелёт», — шулім,
«Мелёт», дерт, кор ва сорӧн
курыд кач кылӧдлім,
Кор медбӧръя ыжнымӧс
вот вылӧ нулім...

Кам игана вӧліны
миянлы школаяс,
Эг лысьтлӧй ми сёрнитны
асланым кывйӧн.
И кытшавліс пемыдлун,
кыдзи кыз толаяс,
Эг вермылӧй путкыльтны
чепталӧм сывйӧн.

А рамлун да терпенньӧ
кутісны вичкоӧн —
Пыр «сарство небеснӧйӧ»
кыскисны попъяс...
И нэм чӧжным,
«грек» тыра гӧльлунӧн личкӧмӧн,
Ми кыскавлім
долыдлун корсьысян нопъяс.

Тадз кык юра сарскӧй сьӧд кутш
лёкысь курччӧмӧн
Ёсь гыжъяссӧ сатшкаліс
миянлы сӧзӧдз.
Быд сьӧкыдсӧ кыским ми
пиньнымӧс мурчкӧмӧн,
И некодлы мог эз вӧв
посньыдик йӧзӧдз...

Но вежис Великӧй Октябр
олан кадъяссӧ,
Важ пеж стройсӧ сотіс
кыдз яр биа лава,
И миянӧс сувтӧдіс
мукӧд йӧз радъясӧ
Да сетіс тшӧтш миянлы
вӧля и права.

Выль нэмӧ сэк пырим ми,
выль туйӧд мӧдӧдчим,
Выль олӧмӧн овмӧдчим,
выль йӧзӧн лоим,
Выль энтузиазмӧн
быд удж вылын сӧвмӧдчим,
И гажа зажиточнӧй
олӧмӧ воим.

Пыр водзӧ ми
шуд валъя саридзӧд гупликтам,
Туй шӧр визьсӧ аддзыны
Партия письтӧ, —
И Коми му миян —
Сӧветскӧй Республика,
Ӧд мӧвпыштныс та йылысь
важӧн эг лысьтлӧй,

Мый вылнаӧдз лэптіс
Октябр революция
Важ «чудьясӧс», миянӧс,
«сьӧд» коми йӧзӧс!
Тадз пасйӧма миянлы выль
Конституция,
Быд кыв йӧзлӧн генийӧн гижӧма –
ӧзйӧ!

Эз кокньыда шед тайӧ:
вӧвлытӧм шудыс,
Сӧветскӧй Республика
сідзи эз воссьы, —
Быд враглӧн пыр лёк вӧчны
пеж киыс лудіс,
И перйим ми шудсӧ
лич лэдзлытӧм косьын.
……………………………..

Но ленинскӧй партия
туй кузя мунӧмӧн
Ми врагъясӧс пасьвартны,
жугӧдны вермим.
Тыр вынйӧрӧн, честнӧя
удж пиӧ сунӧмӧн
Культурнӧй, зажиточнӧй
олӧм ми перйим.

И водзӧ ми нимкодя
сьылігтыр гупликтам:
Ӧд олӧмным тыр шудӧн
ыпъялӧ, ёнмӧ,
Ӧд дзордзалӧ
Коми Сӧветскӧй Республика.
Да лунысь-лун югдӧ
Да лунысь-лун томмӧ!