КОМИ ХУДОЖНИКЛЫ — ЧИСТАЛЁВ ТИМА ВЕНЬЛЫВеня ёртӧй! Тэ нин, со, Туйтӧ сёртін Кызь вит во! Нэм четверть олӧм Тӧдчымӧн яр! Биа пӧсь чолӧм, Ёрт юбиляр! Тэ эськӧ уджалысь крестьянин пи жӧ да, Мыйла кӧ сям абу ӧтмоза вичмӧма: Видзӧдлам коми художество гижӧдад — Тэнад ӧд быд фраза лолалӧ мичлунӧн! Тӧдан тэ комилысь олӧмсӧ-й мӧвпсӧ, Тэнад и ывла выв мӧд ногӧн ӧвтчӧ. Быд гижӧд серпаса, ловъя — Веркӧсті кывнад он довъяв. Тэнад поэзия — Саридз кодь джуджыд, Тэнад и прозаыс — Дзоридз кодь мича. Кызь вит во чӧж вӧлі татшӧми уджыд, Сылысь тэ мичлунсӧ синмӧс моз видзан, Сы понда сьӧлӧмыд пессис, Унаысь шулывлін: «Ок!» Кызь вит во — Зэв ыджыд срок! Ёна нин олӧм лад вежсис. Тӧдлін на тэ, гижысь друг, Туй шӧрсьыд царскӧй каблук. Эз позьлы гижны сэк Асланым кывйӧн, Эз вӧвлы вӧляыс Шеныштны сывйӧн. Разис Октябр тайӧ чепсӧ, Сэксянь лёк олан сям чегсьӧ. Войдӧртӧ туй вӧлі векньыдик, дзескыд, Унаысь подулыс оз вӧлі сюр. Ӧні ми аддзам — Мый пасьта да веськыд, Сӧмын тэ ачыд эн бокӧ кеж — зур!.. Кадыс нӧ, олӧмыс донтӧм? Гӧгӧр ӧд пуӧ да пышитӧ! Темаыд — вӧрзьӧдтӧм, помтӧм! Кӧсйӧм мед вӧлі, оз дышӧд-а! Быд юбилей ми сӧветскӧй странаын Ӧтувъя быдмӧмкӧд, вермӧмкӧд йитам, Сы вӧсна тшӧтш талун празднуйтам ставным — Коми общественносьт — Асланым литературалысь кыптӧм. Веня ёрт! Ыдждӧдла тэнӧ и юбилей лунтӧ! Сьӧлӧмсянь бурсиӧм месянь примит: Ассьыд художество гижан мичлунтӧ Социализм тэчан уджъяскӧд йит! Тайӧ бур колана мог кузя ло Ыджыд сӧветскӧй писательӧн Уна, уна во! Мед олас Социалистическӧй культура! Мед кыптас Коми литература!
