СИКТЫНАссьым сиктӧс ӧдва тӧді; Быттьӧ — сійӧ, быттьӧ — мӧд; Быдӧн шензьыны ме мӧді — Миян сиктным вӧлі сьӧд: Швитя-шватя, Кося, матя, Няйта, лӧма, Киссьӧм кӧма, Челядь вылӧ ньӧръя, Пу агаса-гӧръя, Кодалан помеча, Урӧка-вомидза, Бубыляа, Вежа ваа, Нимкыв сюяна, Шева чумана, Беса-дявӧла, Петыр-Павела, Макуттяа: «Пресвятая! Сьвят, сьвят, сьвят! Аминьӧй, мат!» Матькӧм кылӧ на и ӧні, Сӧмын абу важкодь сӧс, Няйтыд эм жӧ, вичко звӧн и... Толькӧ быттьӧ вежсьӧм йӧз. Том йӧз велӧдчыны синӧ, Со — читальня, тонӧ — клуб... Эз вӧв важӧн тайӧ нинӧм, Сиктлӧн вӧлі олӧм — люб: Швитя-шватя, Кося, матя... Дядьӧ тӧдӧ пятилетка, Тӧдӧ — кулак вӧчӧ вред; Со, важ ен джаджъяс — газетъяс, Стенас — Ленинлӧн портрет. Воклӧн нылыс комсомолка, Чойлӧн пиыс — пионер. Быдӧн грамотнӧй да тӧлка... Важӧн вӧлі олан сер: Швитя-шватя, Кося, матя... Аддза: шаньӧсь порсьяс, кукъяс, Весиг мӧслӧн чистӧй зад... Пу гӧр пыдди, видзӧд, — плугъяс, Эм нин кымынкӧ «зигзаг». Уна выльтор синмӧ сатшӧ, Гӧгӧр пуӧ ыджыд ӧд. Миян сиктным эз вӧв татшӧм, Сылӧн вӧлі ӧдыс мӧд: Швитя-шватя, Кося, матя... Выльлань мунӧ весиг пӧльӧ, Шуӧ: «Важыд — ставыс лӧж, Ӧні луннас тӧдан бӧльӧ, Мый эг тӧдлӧй кузь нэм чӧж. Видзӧд, ӧні таргӧ трактор, Молотилка... ероплан... Важӧн сёйлім кушман, тшактор... Ок, важ олӧм, шондібан!» — Швитя-шватя, Кося, матя... Миян сиктным воддза радын, Быд удж вылын збой да ёсь, Тӧдӧ, коді шусьӧ врагӧн, Тӧдӧ, мый — классӧвӧй кось. Быдӧн кадын петӧ вӧрӧ, Быдӧн срокӧдз тыртӧ план... Аттӧ, сиктӧй дзик мӧд кӧра, — Важӧн вӧлі сылӧн сям: Швитя-шватя, Кося, матя... Мыйла сиктӧй олӧ пелька? Мыйла оз мун воддза моз? Вӧлӧм, зільӧ партячейка, Вӧлӧм, зільӧ комсомол, Вӧлӧм, сиктӧс кыскӧ гажас Бура уджалысь колхоз. Нимкодь босьтӧ: бырӧ важыс, Сиктӧй некор нин оз ло Швитя-шватя, Кося, матя, Няйта, лӧма, Киссьӧм кӧма, Челядь вылӧ ньӧръя, Пу агаса-гӧръя, Кодалан помеча, Урӧка-вомидза, Бубыляа, Вежа ваа, Нимкыв сюяна, Шева чумана, Беса-дявӧла, Петыр-Павела, Макуттяа: «Пресвятая! Сьвят, сьвят, сьвят! Аминьӧй, мат!» — Лоӧ сиктӧй выль, Збыль!
