КОМИ КЫП


Коми мырсьысь йӧзӧс нартитлісны нэмсӧ,
Тӧдліс сӧмын сьӧкыд удж да курыд шог.
Саръяс озыръяскӧд пычкылісны вемсӧ.
Октябр мездіс — вайис выль бур оланног.

Припев:
		Важыс бӧр оз во,
		Нартитӧм оз ло!
		Ӧдӧн зымӧдӧ социализм.
		Туйсӧ веськӧдлӧ
		Вына Вэ-Ка-Пӧ,
		Знамя — ленинизм,
		Туй помыс — коммунизм.

Пемыд парма зумыштчӧмӧн шувгис нэмсӧ,
Некод сылы некор ловзян удж эз вай.
Ӧні вӧрзьӧдӧма морӧссӧ и вомсӧ —
Кыптӧ выль индустриальнӧй Войвыв край.

Припев.

Коми сиктын оз коль важлӧн пемыд вуджӧр.
Гырысь дзулькйӧн пуӧ овмӧс тэчан удж;
Коми мырсьысь войтыр коллективӧ вуджӧ,
Дзикӧдз бертӧ-нетшкӧ кулак класслысь вуж.

Припев.

Коми уджалысь йӧз тувччӧ гырысь ӧдӧн,
Веськыд туйысь сійӧс кежӧдысь оз ло.
Тшӧтш культурнӧй йӧзкӧд орччӧн сувтас ӧдйӧн,
Важ моз сійӧ пикӧ оз нин некор во.

Припев.

Ыджыд индустрия локтӧ зумыд ӧдӧн,
Вӧрысь ӧтдор, уна эмбур куйлӧ дась.
Кӧрт туй пӧртас Коми муӧс регыд мӧдӧ:
Кыптас тані мӧд Урал, Баку, Донбасс.

Припев.

Водзӧ, водзӧ став рабочӧй класскӧд ӧтув!
Медым бырӧ став мувывса капитал!
Сӧвет власьтӧс видзны быд здук ставным гӧтов,
Мирсӧ вермас гӧрд Интернационал!