КЫЛӦДЧАН СЬЫЛАНКЫВ


Камгӧм, дзажгӧм ягын эштіс,
Лӧнис тӧвся гор.
Юяс дорӧ уджыс вешйис —
Быд морт ордын зор.
	Вӧр лэдзӧны юӧ,
	Зіля уджыс пуӧ.
Уна вын да уна пӧра
Вичтас выль удж ног.
Гӧрӧм-кӧдзӧм оз коль бӧрӧ,
Могмас кык ён мог, —
	Кыкнанныс зэв жмитчысь,
	Тулысыд оз виччысь.
Му шар пасьта уджным юргӧ,
Долыд вӧльнӧй удж!
Эк, буржуй, эн китӧ чургӧд —
Миянӧс он судз!
	Он повзьӧд син лапъяс,
	Ми ӧд абу рабъяс!
Мирыс ставыс бура тӧдӧ,
Мыйла пӧльтан лӧж:
Пятилетка зымгӧ ӧдӧн —
Тэнӧ босьтӧ дрӧж.
	Кӧть тэ ещӧ скӧрмы,
	Миян вӧр оз йӧрмы!
Воча кывным враглы татшӧм:
— Кылӧдам став вӧр!
Сылы сійӧ горшас сатшӧ,
Бурджык кыв оз тӧр.
	Коді ниртӧ мышсӧ —
	Враглы лэчтӧ гыжсӧ.
Зіля тшӧтш Выль Войвыв дорӧ
Мырсьысь коми йӧз.
Оз ло страшнӧ враглӧн ёрӧм,
Воча лэптам грӧз:
	Жугӧдам вӧр-валйӧн,
	Гырысь керйӧн, шпалйӧн!