ЛЕНИН — ӦЗЙӦДЫСЬ НИМ

«Ми копырӧн казьтылам талунъя лун,
Кор Ленинлӧн олӧмыс кусі».

Уналӧн
	Унаысь
		Сьӧлӧмыс усьлӧ;
Няргывлӧ:
	— Вынӧй оз судз!
Ыджыд удж вӧчигӧн
	Лачаыс куслӧ;
Чорыда топӧдлӧ мудз,
Сойясыс ӧшӧдчӧ рудз.
Мукӧдлӧн
	Повзьӧмла
		Сьӧлӧмыс измӧ;
			Нюкрасьӧ,
				Катлӧдлӧ юр:
					Воам кӧ
						Сё воӧн
							Социализмӧ,
					Сійӧ нин
						Зэв эськӧ бур.
			Сӧмын тай шог —
			Мунан туй лёк,
			Регыдӧн шудыс оз сюр!..
Полысьяс,
	Няргысьяс,
		Талунъя лунӧ
Восьтлӧй кӧть
	Ассьыныд син,
Вемныд мед дзикӧдз эз сім!
	Ленинлысь
		Кольӧм заветъяссӧ
				Видзам!
Ленинизм —
	Олӧмлӧн пас,
Быд уджлы
	Сійӧн ми
		Вужйӧдзыс судзам!
Быд уджлы
	Ордымыс дась,
Паськӧдӧ
	Рабочӧй класс.
Уналӧн
	Сьӧлӧмыс
		Ленинӧн ӧзйӧ.
Ленинлӧн велӧдӧм
	Некор оз вун!
Кодкӧ кӧ
	Му шарсӧ
		Выльмӧдны кӧсйӧ,
Сы туйӧд веськыда мун,
Гуранӧ,
	Бокӧ эн сун!
Вождьнымлӧн индӧдъяс
	Збыльмӧны — вемӧс,
Ӧзтӧны
	Уджалысь войтырлысь вем.
Ёртъяс и —
	Врагъяс и —
		Став мирыс шемӧс:
Матысмӧ выль пӧлӧс нэм.
Ленинизм некор оз берд.
Туй визьсӧ веськӧдлысь эм —
Ленинскӧй ВКП(б)!