ВО ЧӦЖСЯ ОТЧЁТ


Сизимдас сизимысь лешкыштны лоӧ, —
Талун тай важ волы пом вӧлӧм воӧ?
	Он эштыв сёйны ни юны —
	Сы ӧдйӧ пӧраыс мунӧ!
	Веськыда сунӧмӧн сунӧ,—
	Весигтӧ лун лыдыс вунӧ!
		Кватитчи, со —
		Кольӧма во!
Мокасьтыд, муртса ӧд эг коль ме бӧжӧ!
Мыйяс ми уджалім во гӧгӧр чӧжӧн:
	Кыдзиджык коллялім вотӧ,
	Кутшӧма олӧмным содӧ,
	Кытъясті падмӧ да чотӧ, —
	Петкӧдла аслам отчётӧн.
		Ёртъяс!
(Тадз заводитлӧны докладчик мортъяс).
Восьтам ми веськыда «без рассуждения»
Ассьыным во чӧжся став достиженьеяс.
	Тіянлысь кадсӧ ог гусяв —
	Ог понды висьтавны кузя.
	Пасъя, дерт, юрӧ кӧ усьӧ,
	Нелючкиторъяс, кыдз шусьӧ, —
		Ну, «одним словом», —
		Быдторйыс лоӧ.
	Висьтала, час,
	Уджлысь ним пас.
Тулыснас зэв кузя сулаліс кӧдзыд.
Сы бӧрын кутчысим кылӧдны вӧр.
	Сэсся, дерт, гӧрим да кӧдзим, —
	Кӧнсюрӧ эз нин вӧв гӧр.
	(Воськовтім водзӧ ми, другъяс,
	Ёна нин содісны плугъяс).
Гожӧмбыд страдуйтім-керим, —
Зэрис да эз вӧв зэв бур.
Ноксим тшӧтш снастьӧн да черӧн —
Ва кывтчӧс тойлалім пур.
	Арбыд ми сідзи жӧ пӧнсим —
	Бара на кылӧдім вӧр.
	Дерт, эськӧ ставным нин дӧнзим,
	Сӧмын ӧд кадыс зэв скӧр:
Мед эськӧ йи улӧ вӧрыс эз веськав,
Мед эськӧ сы вӧсна олӧм эз дзескав.
	Кынмис на, дерт,
	Вель уна кер.
Кылӧдім вӧртӧ ми тулыссянь арӧдз,
Мырдӧн дзик иналім Архангельск карӧдз.
	Водзӧ мед тадзи эз ло!
	Нуӧдам збыльысь
	Ӧддзӧдӧмпырысь
	Тавося вӧр лэдзан во!
	Процентыс вӧлі мед сё!
	(Рочӧн кӧ — сто!)
		Со!
Гырысьджык уджъясӧ ӧні ми вуджам, —
Во чӧжся воськолыс мый вӧлі, кутшӧм?
	Вит вося плантӧ ми олӧмӧ пӧртам:
	Вӧчӧны Москвасянь миянӧ кӧрт туй.
	Ухтаӧ камгӧны шоссе, —
	«Транспортнӧй проблема» воссьӧ!
	Туй вӧсна воддза моз сьӧлӧм оз вись:
	Воссис нин сынӧдӧд лэбалан визь!
Быдлаын колхозъяс воссисны,
Слӧбӧда сиктӧ со вӧр завод стрӧитны босьтчисны.
	Быд лунъя уджӧ
	Таво ми вуджим.
	Вӧлі мед уджыслӧн бур «аккурат» —
	Весалім лӧпъясысь соваппарат.
	Партчистка нуӧдім — зэв ыджыд мог,
	Сӧстӧма весалім, эз вӧв мед ёг.
Культура ӧдйӧ жӧ швичкӧ,
Пемыдсӧ зырӧ да личкӧ, —
Тупкысис Степановскӧй вичко, —
Вералысь сӧнъяссӧ орӧдӧ-тричкӧ.
	Йӧз костын водзмӧстчӧм содӧ,
	Врагъяслысь пыксьӧмсӧ сотӧ.
	Чукӧртам первойысь нянь
	(Гӧрд обоз вайисны — зэв сійӧ шань!)
		Бергӧдчӧ юр —
		Сы мында бур!
Нелючкиторъяссӧ висьтавны нинӧм, —
Вочасӧн ставсӧ ми лёкторсӧ синам.
	Бур уджсӧ ӧддзӧдам ёна,
	Сійӧ ӧд медся на дона!
	Бурыс кӧ быд уджӧ пырас,
	Нелючки ачыс сэк бырас!