ОКТЯБРЛЫ


Тэнсьыд ыдждасӧ, судта-джудждасӧ
Помӧдз артыштны некод оз куж.
Тэнад лов шыысь важыс жугласьӧ,
Кыптӧ му вылын выль пӧлӧс руж.

Тэнад видзӧдлӧм чепъяс дрӧбитӧ —
Йӧзыс черӧбтӧ, мездыссьӧ Мир.
Тэнад воськолысь муыс здрӧгнитӧ, —
Класслӧн класс вылӧ пузьӧма вир.

Тэ дор сулалӧ чорыд гӧраӧн
Став му пасьтаса уджалысь йӧз,
Личкас врагъясӧс колан пӧраӧ,
Кодъяс тэ вылӧ лэптӧны грӧз.

Тэнад знамяӧн гырысь радъясӧн
Йӧзыс восьлалӧ, оз тӧдлы мудз.
Знамя копыртны тэнад врагъяслӧн
Выныс-эбӧсыс некор оз судз.

Доран крепыда биа мӧлӧтӧн
Муын вӧвлытӧм ӧтувъя строй,
Гӧгӧр зэлӧдан уклад гӧрӧдӧн,
Камган — оз мӧрччы некутшӧм дой!

Тэнад чужӧмсянь му шар кытшовтіс
Шонді гӧгӧрыс дас кыкӧд пӧв,
Олӧм бергӧдчис, уна тыдовтчис
Выльтор, тэӧдз мый войдӧр эз вӧв.

Тэнад чужанін ёнмӧ ӧддзӧмӧн,
Вежӧ пытшкӧссӧ, выльмӧдӧ бан;
Мирлы шензьымӧн, враглы бӧрддзымӧн
Пӧртӧ олӧмӧ вит вося план!

Вынмӧм СССР повтӧг горӧдіс:
«Суам, пановтам капитал му!»
Ассьыс кӧсйӧмсӧ нуӧ чорыда —
Уджыс оръявтӧг мунӧ быд лун.

Веськыд туйӧдыд водзӧ ӧддзӧмысь
Тэнӧ падмӧдысь некод оз ло!
Дженьыд олӧм пом тэныд вӧзйӧмыс
Бӧрӧ кольӧма — некор оз во.

Биӧн лолалысь, гымӧн восьлалысь,
Биӧн му шарсӧ пасьтала рез!
Ошкам тэнӧ ми, важ мир косялысь,
Ваян мувывса олӧмлы мез!