КОЛЛЕКТИВАддза, ру пыр моз выль олӧм тӧдчӧ. Кыла, ружтӧмӧн нюкрасьӧ нюр; Тӧда, пу гӧрйӧн некод оз вӧтчы — Гӧрны пу гӧрйӧн лӧз нюр оз сюр. Нэм чӧж крестьянин ньылаліс шогсӧ, Мусӧ вынсьӧдліс ньылӧмнас пыр, Сэтчӧ чегъявліс кисӧ и коксӧ... Мый нин казьтывныс, лёк олан дыр! Сиктлӧн сьӧкыдлун кольӧма ылӧ. Йӧкты, сьӧлӧмӧй! Нимкодясь, ворс! Кывзы: му вылын машина сьылӧ — Вежис вӧвъяслысь гӧрдлӧм да «корс». Аддзан, ыпйӧмӧн ӧзъялӧ кадыс. Майбыр, уджыдлы вӧляыд эм! Сюрас сьылӧмлы гажаджык ладыс, Тэчам сьыланкыв — гажӧдас нэм! Гӧрам, Шыльӧдам, небзьӧдам муяс, Оз коль некытчӧ межа ни бор. Видзӧд: вочасӧн паськалӧ туйыс, Быдӧн сувтӧны коллектив дор. Регыд сиктъяслӧн чужӧмыс вежсяс, — Трактор!.. Пасьмунас пу кока гӧр. Коді кольччыны зільӧ ас кежсьыс — Некор оз тӧдлы машина кӧр. Кылан: ыб вылын машина гутшкӧ, Сяргӧ выль пӧлӧс кывлытӧм шы. Кутчысь, ӧтвылысь выль олӧм путшкы, Му выв дзоридзысь сарапан кы! Кадыс — Тувсовъя рас кодь жӧ варов, Уджыс — Котыра сьылӧм кодь дзик. Босьтчам сьӧлӧмысь уджавны яра, Тэчам выль ногса, выль сяма сикт! Ставным Ленинлысь велӧдӧм тӧдам, Сылӧн сиӧмыс — Нэмӧвӧй висьт... Ӧтув восьлавны выль туйӧд мӧдім. Шонді, Югӧртӧ ёнджыка му вылӧ кисьт!
