ТЕХНИКА
(Либӧ сё морӧ робота)


Важӧн нин кывсьӧ:
Сыктывдін карын
Кутшӧмкӧ арын
Эштас пӧ пывсян.

Стеныс пӧ кыз —
Цемента из,
Йиркыс бетон, —
Пывсян пӧ ён.

«Городскӧй баня»:
Тӧдлам и пывсьӧм,
Небзьылас лы-сьӧм,
Екуня-Ваня!

Быдӧн зэв рад:
Матысмӧ кад...
Кыссьӧ нин «чӧрт» —
Пывсянлы пӧрт.

Техника вылын —
Американскӧй,
Улича вылын —
Республиканскӧй.

Вит метрӧн лун —
Сэсся оз мун,
Ёрччы кӧть бӧрд —
Сё трустӧ, пӧрт.

Нальӧ гаг ӧдйӧн
Гез йылын вӧрӧ,
Дас кык морт вӧрӧт
Бергӧдлӧ рӧдйӧн.

Дзуртӧ кер додь,
Мунӧм оз сод.
Воштӧны вын,
Нырӧны лым.

Техника бур —
Бергӧдчӧ юр:
Кер додь да гез,
Вӧрӧт да йӧз.

Нинӧм тадз жӧдзны!
Уджысь ог полӧй,
Ме ногӧн, колӧ
Субӧтник вӧчны.

Чуксала: Эй!
Петаламӧй!
Вынйӧрным кӧрт —
Кыскамӧй пӧрт.