ОКТЯБРЛӦН ВОСЬКОВТӦМ
(Сьывсьӧ «Смело, товарищи...» ногӧн)


Ёртъясӧй! Тувччалӧй водзӧ,
Бергӧдчӧм бӧрлань оз ло!
Октябрлӧн знамяыс ломзьӧ —
Ӧзъялӧ дас ӧти во.

Кок шысӧ кылӧны важӧн
Мувывса нартитӧм йӧз,
Олӧны сы вылӧ гажӧн,
Сы вӧсна сьӧлӧмныс пӧсь.

Буржуйяс йирӧны пиньяс,
Дугдывтӧг лэчтӧны гыж,
Лёк биӧн ӧзйӧны синъяс,—
Зільӧны лэптыны тыш.

Сьӧлӧмныс понъяслӧн висьӧ.
Быд ногӧн панӧны зык —
Октябрлысь паськалӧм бисӧ
Некыдзи некод оз пык!

Став му выв уджалысь йӧзыс
Сулалӧ Сӧветъяс дор,
Ӧтвылысь сьӧлӧмныс ӧзйӧ, —
Ӧтувъя выныд оз ор!

Гӧрд Октябр восьлалӧ збоя,
Му гӧгӧр кытшовтӧ пыр,
Ӧзъялан югӧрсӧ койӧ —
Югӧрнас му шарыс тыр.

Ёртъясӧй! Гораджык сьылӧй,
Ветлас мед кыпыда лов!
Гӧрд Октябр воськовтіс ылӧ —
Воськовтіс дас ӧти во.