2.000–4.000.000
(«Югыд туйлы» чолӧм быттьӧ пыдди)


Талун ме эновтла мӧд пӧлӧс думъяс.
«Югыд туй» газетлы талунъя висьт.
Сувтлытӧг шлывгӧны-лэбӧны лунъяс...
Кык сюрсӧд номер нин! Нёль миллён лист!

Уджыс сэн ломалӧ, быттьӧ пӧсь пачын
(Тӧда ме — уна во ноксьылі ачым),
Он весиг эштывлы шойччыны сутш,
Оз ӧд позь вештыны аскиӧдз удж.

Мыйда нин пӧльзасӧ йӧзыслы сетіс, —
Сы йылысь тані ме нинӧм ог шу:
Кык сюрсӧд номер кӧ газетлӧн петіс,
Дерт, кӧнкӧ, весьшӧрӧ ставыс эз мун!

Наперво, верма ме шуны ас пайысь:
Дас во чӧж сьӧкыда таджъясис-кайис
Чой паныд «Югыд туй» газетлӧн додь, —
Сылӧн история — мойданкыв кодь.

Вӧвліны пӧраяс (эг на ме вунӧд):
Кайыштлас доддьыд да исковтас бӧр,—
Дорӧдтӧм кокъяснад он ёна зумӧд,
Кӧть вӧлі эновт да пуксьы да бӧрд...

Кыдзкӧ тай бок вылас дзикӧдз эз пӧр-а,
О! Ӧні ёна нин збодера вӧрӧ:
Газетным комиӧн петӧ быд лун,—
Дас ӧти во вылад бӧрлань оз мун!

Селькоръяс унаӧн, отсасьысь тырмӧ,
Ямщикас пукалӧ вежӧра морт;
«Югыд туй» вочасӧн сӧвмӧ да бурмӧ,—
Веськӧдлы вӧжжинад, Минин Миш ёрт!

Куим сюрс номерӧдз газет кор воас,
Тиражыс сылӧн мед дас сюрс нин лоас,
Лист лыдыс лоас мед уна миллён!
Чинны мед вермас сэк газетлӧн дон!