ПОДУВСЯНЬ ЮР ВЫЛӦДЗ
(Нывбабаяслӧн важ норасьӧм да выль ошйысьӧм)


Пыр ме войдӧр овлі чӧв,
Тӧдлі ӧтитор:
«Кӧбыла пӧ абу вӧв,
Баба — абу морт».

Ныв дырйи на уна пӧв
Батьӧ шырліс борд:
«Кӧбыла пӧ абу вӧв,
Баба — абу морт».

Велӧдчыны кад эз вӧв:
Тэд пӧ сэсь немтор —
«Кӧбыла пӧ абу вӧв,
Баба — абу морт».

Верӧс сайын гаж эз вӧв,
Долис мужик-морт:
«Кӧбыла пӧ абу вӧв,
Баба — абу морт».

Дзик мед шыасьӧм эз вӧв
Мужик делӧ дор:
«Кӧбыла пӧ абу вӧв,
Баба — абу морт».

Скодъяс вылын шы ни тӧв,
Эн лысьт лэдзны гор:
«Кӧбыла пӧ абу вӧв,
Баба — абу морт».

Пыжӧ бӧжавны эн сӧв —
Тӧд пӧ сынантор:
«Кӧбыла пӧ абу вӧв,
Баба — абу морт».

Эськӧ ӧти мужик морт
Бабатӧг оз ов:
Буракӧ тай, колантор
Нывбаба улов!..

* * *

Ӧні пӧльтӧ долыд тӧв,
Оз нин некод сёрт:
«Кӧбыла пӧ абу вӧв,
Баба — абу морт».

Ӧні миян Сӧвет власьт
Олӧ баба дор;
Оз нин мужик тупйӧд дасьт
Тупкыны кыв-вор.

Баба — абу кӧбыла.
Баба — человек,
На собранье я была —
Уна тӧді сэк.

Воӧ миян праздник лун.
Кывзы, баба ёрт:
Ленин туйӧд збоя мун —
Тэ ӧд мездмӧм морт!