КЛУБ
(Додзса клуб йылысь)


Воддза воӧ волі клубӧ —
Гажӧдчылім прамӧй клубын.
Ӧні тешитчӧмъяс дуб —
Быри миян прамӧй клуб.

Некыдз сьӧлӧмъяс оз бурмы,
Клубыд абу — некӧн дурны.
Дзикӧдз воши оланног,
Клубтӧг овны вывті шог!..

Петан рытын ывла вылӧ,
Гудӧк нязгӧм эськӧ кылӧ:
«Кирна-рина, курна-рин»,—
Сӧмын абу йӧктанін.

Выль «клуб» сэсся ӧні восьтім,
Кристьӧ тьӧтлысь керка босьтім —
Медӧн (эз босьт ыджыд дон),
Бара гажӧдчам ныв-зон!

«Клубысь» мынтам няньӧн, пескӧн,
Нывбабаяс — гӧлик-роскӧн,
Зонъяс кыскам турун нӧб, —
Таысь донтӧг «клуб» он ньӧб!..

Коді вайӧ — сійӧ йӧктӧ,
Кушӧс «клубысь» мунны тшӧктам,
Коді нинӧмтор оз вай —
Сылы абу йӧктӧм пай.

Бурлак таджъялӧ нӧб турун,
Челядь зептас вайӧ вурун,
Быд ныв вайӧ сю ли ид,—
Гусьӧн, мам-бать мед оз вид...

Волывлыны тайӧ «клубӧ»
Бабаяслы зэв жӧ любӧ,
Коді кайӧ кильчӧ пос —
Сійӧ-й вайӧ гӧлик-рос...

Додзса том йӧзлы зэв любӧ:
Со пӧ миян кутшӧм клубыс.
Олім нин пӧ клубтӧг дыр,
Ӧні майбыр, сюрс майбыр!..