ВОДЗ НА ШОЙЧЧЫНЫ
(Думъяс)


Сьӧкыд кад олам ми:
Мувывса гӧль вӧсна
Пессям да тӧждысям.

Выль олӧм доригӧн
Выннымӧс жалиттӧг
Асьнымӧс вунӧдам;

Югыд туй писькӧдам,
Весалам, шыльӧдам,
Водзӧ пыр паськӧдам.

Дзоньвидзалун вӧсна,
Меддонатор вӧсна,
Некор и думыштны.

Кватитчан — овсьӧма!
Вынйӧрыд косьмӧма,
Став уджыд эштӧма...

Сьӧлӧмысь тільсьысьяс,
Йӧз вӧсна шогсьысьяс,
Регыд тай олӧны!

Уна нин гортъяс ми
Бур, дона ёртъяслысь
Му пиӧ гуалім.

«Мед!» — шуам. Шогнымӧс
Сьӧлӧмын ланьтӧдам:
Шогнад он пӧсӧбит!

Мед найӧ шойччӧны!
Выль йӧз ӧд сувтасны
Бур уджсӧ помавны.

Ми, кытчӧдз ловъяӧсь,
Мудзам кӧть усьласям,
Водзӧ пыр восьлалам.

Эм на кӧ вынъясным
Ӧні, шуд доригӧн,
Оз на позь шойччыны.

Пемыд зэв коми йӧз:
Сир курыд шог на пыр
На гӧгӧр бергалӧ;

Колӧ пыр чуксавны,
Лёк, пӧгиб олӧмысь
Регыдджык мездыны;

Сьӧд шогсӧ бырӧдны,
Велӧдны, кыпӧдны,
Туй вылӧ веськӧдны;

Мувывса культура
Ӧзйӧ мед на пытшкын,
Йиджӧ мед сьӧлӧмӧдз!

Гашкӧ нӧ, мӧдысьджык
«Аттьӧ» на миянлы
Кодъяскӧ шуасны.