«СУД МУНӦ!»


Пыри ӧтчыд суддя ордӧ,
Самӧй вӧлі мунӧ суд.
Суддя сэні лёкысь горзӧ:
— Здесь идет народный суд,
И нельзя вам, подсудимый,
По-зырянски здесь болтать!
Показанья допустимо
Лишь по-русски излагать!..
— Дерт, сідз... батюшко... кыдз шуны...
— Ах, ты хочешь суд сорвать?!
— Я тай, зонмӧ... ручкӧй... вуні...
— Я прошу вас замолчать!

Судын суддя — председатель,
Бокас эм кык заседатель,
Сӧмын повзьӧмаӧсь проч —
Председательыс ӧд роч.
Эн шу председатель дырйи
Коми судын коми кыв.
Дзик пыр сійӧ видігтырйи
Лёкысь шуас: — Это срыв!..

Сэні босьтіс менӧ шемӧс:
Мыйсяма нӧ тайӧ суд?
Суддя водзын кывтӧм пемӧс —
Коми морт, дзик пемыд, руд.
Гашкӧ, мортыс «ручкӧй» ногыс
Оз куж, збыльысь, нинӧм дзик?
Со кӧн коми йӧзлӧн шогыс,
Со на кӧні налӧн пик.

Чайтад, гашкӧ, тадз пӧ важӧн,
Зэв нин важӧн вӧвлӧма,
Кор на ещӧ ыджыд гажӧн
Коми абу овлӧма?

Эз зэв важӧн... Эз на бара
Талы коль зэв уна нэм;
Татшӧм «суддя» Сыктывкарын
Ӧні на пыр миян эм.

Думыштан да, збыльысь быттьӧ
Тайӧ — важ лёк олан ног:
Коми йӧзлы нимкодь пыдди
Пыр на паныдасьӧ шог...

Вӧчӧй, ёртъяс, юра войтыр,
Коми йӧзлы коми суд,
Мед кӧть аддзас пемыд войтыр
Ичӧтика аслыс шуд.