«ЮГЫД ТУЙ»


Дыр нин ми, коми йӧз, омӧля олім,
Пыр вӧлі син водзын пемыд да руд,
Юрнымӧс кыпӧдны вылӧджык повлім,
Эг лысьтлӧй корсьлыны аслыным шуд.

Мый вӧлі сьӧкыдыс, дзескыдыс — бурысь
Огӧ нин казьтылӧ, кольӧма мед!
Ӧні ми ас ногса олӧмӧ пырим,
Миянлы югыд туй воссьӧма, мӧд!

Коми му пуксьӧма паськыда, кузя,
Коми му быдсяма эмбурӧн тыр,
Коми му вӧр улын вӧрзьывтӧг узьӧ,
Коми му виччысьӧ садьмӧдӧм дыр.

Лолыштӧй сьӧлӧмысь, вокъяс да чойяс,
Ӧдйӧджык вӧрзьӧдӧй ассьыныд му!
Шеныштлӧй, кыпӧдлӧй вынъяса сойяс,
Горӧдлӧй: садьмы нин, эй, Коми му!

Миянлы «Югыд туй» выль олӧм индас,
Уджавны кесйӧдас, югдӧдас юр,
Сьӧкыдлун кокньӧдас, тӧдтӧмтор чинтас,
Нуӧдас водзӧ пыр, висьталас бур;

Сьӧлӧмъяс ловзьӧдас, сюсь йӧзӧ воштас,
Чукӧртас му кузя быдсяматор.
Дышъясӧс дивитас, зіль йӧзӧс ошкас,
Быдлаӧ судзсяс ӧд сылӧн кыв-вор.

Чеччӧй жӧ, коми йӧз, кутчысьӧй уджӧ
Ас вӧсна зільджыка, эн видзӧй жуй!
Войдӧр кӧ пессьылід — ӧні он мудзӧй;
Воссьӧма зэв паськыд, зэв югыд туй!