ЭН ТӦЖДЫСЬ! ЭН ШОГСЬЫ!


Пыжтӧг джуджыд ю он вудж,
Бордтӧг выліті он лэб.
Рочӧн петӧ коми «Удж»,
Коми гижӧд овлӧ жеб, —
	Шоча.

Менам юр вывтыр дзик удж,—
Кыдзи верман — сідзи-й гиж!
Пӧра абу весиг сутш.
Со мый шуа тэныд, «Видз»,
	Воча.

Прӧстӧй шогсьӧм! Воас кад,
Коми йӧзлы долыд лун,
Ставныс лоӧны зэв рад, —
Коми гижӧд оз на вун, —
	Кылан?

Республика воссяс кор,
Сэки лоӧ «Уджыд» выль;
Сэки уна гажатор
Мича коми кывйӧн, збыль,
	Сьылам!