ГАЖА САД


Ӧдйӧджык садйӧ ми мунам,
Чукӧрӧн овны зэв бур!
Бать-мамлы челядь ми шуам:
«Гажаджык олӧм оз сюр!»

Быдмыны гажтӧм зэв гортад:
Сьылӧм ни ворсӧм оз мун.
Ӧні ми садйын пыр ворсам,
Ок, кутшӧм гажа быд лун!

Гортысь ми садйӧ пыр пышъям,
Миянлы гортын пыр шог.
Садйын ми пуксьывтӧг ышмам —
Велӧдчам ворсны быд ног.

Ставным ми — уджалысь пиян,
Миянӧс йӧртны оз позь;
Быдтор ми вӧчам ас киӧн
Кокньыда, гажӧдчигмоз.

Быдтортӧ вӧчалам сёйысь,
Рисуйтчам, мойдасям ми:
Сьылам да гажӧдчам войӧдз,
Ворсігӧн оз мудзлы ки.

Кабала кудъяс ми кыам,
Вундалам быдсяма бас.
Мачасям, котралам, гыам,
Гажӧдчам ми уна час.

Вунлӧны садйын бать-мамъяс,
Нинӧмысь гажным оз быр.
Мыськалам тасьтіяс, паньяс
Асьным ми, челядьяс, пыр.

Пуксям ми, челядьяс, сёйны,
Тырмас сэк быдӧнлы удж.
Пач дорысь сёянтор вайны
Кокъясным миян оз мудз.

Майбырӧй, гажа жӧ олӧм!
Майбырӧй, гажа жӧ кад!
Некор оз вун садйӧ волӧм,
Некор оз вун гажа сад!