ГУБЕРНЯТӦМ ГУБЕРНАТОР


Сыктывкарын кылӧ звӧн,
Уськӧдчис гӧль пась ни кӧм:
	«Ойя жӧ да ойя!»
Озыр вӧччис выльысь-выль,
Поп-дяк сэні гора, збыль,
	Сьылӧ «алилуйя».
Миян карын ыджыд гаж,
Кыптіс бара олӧм важ, —
	«Губернатор» вайис.
«Коммунистъяс тіян кӧн?
Петкӧдла ме налы звӧн,
	Чышкышта ме найӧс!
Губернатор ме зэв шань:
Вая вина, еджыд нянь,
	Быдсяма эмбурсӧ;
Локтӧ сакар, локтӧ чай,
Табак, майтӧг — пӧлучай!
	Юксьӧ да эн пурсьӧ!»
Коммунистлы тупкис вом,
Исполкомлы вӧчис пом,
	Восьтіс важ управа.
Няньӧн-солӧн озыр йӧз,
Делегатъяс — быттьӧ гез —
	Корӧны важ права.
Латкин налы кокнас — зым!
Делегатъяс джоджӧ — гым!
	(Пӧрадокыс мӧрччӧ).
«Юрын шапка мед эз вӧв,
Сувтӧй лючки шы ни тӧв,
	Вылыс паськӧм пӧрччӧй:
Чӧвтӧй пыр жӧ пернапас,
Миян ен мед отсалас
	Краснӧйяслы сывны!»
Поп-дяк тӧдӧ ассьыс удж:
Лун-лун ветлӧ, оз тай мудз
	Молибенъяс сьывны.
Коммунистлысь вӧтлӧ «пеж»,
Вежа ваӧн резӧ: кеж!
	«Помилуй нас, божӧ».
Тырмас резны уна во,
Сыктыв валы пом оз во:
	Локтӧ уна вожӧд.
Дивӧ! Карын пырысь-пыр
Интеллигент лэптіс ныр —
	Горзӧ: «Латкин, браво!»
Интеллигент, муса друг,
Тӧдам, мыйла шызин друг —
	Корсян кутшӧм права.
Латкин йӧзлы шуд эз вай,
Эз лок сакар, майтӧг, чай,
	Эз верд еджыд няньӧн;
Прӧста лои гаж да звӧн,
Прӧста лои поп-дяклӧн
	Молибенъяс панӧм.
Сӧветскӧй власьт воис бӧр,
«Губернатор» коклябӧр
	Садьтӧг карысь кыскис.
Быри Латкин, быттьӧ тшын.
Уна эмбур, уна вын
	Крестьяналысь пычкис.