ГАЖАИН, МУСАИН
(Ас му)


Радейта ме тэнӧ, ас чужан муӧй!
Муна кӧть мӧд муӧ — тэ дінын думӧй.
Гаж бырӧ, сьӧлӧм пыр кӧсйӧдӧ бӧрдны,
Мый понда — ог вермы некыдзи тӧдны…

Радейта тэнсьыд ме тулыс и гожӧм,
Зэра ар, кӧдзыд тӧв, во гӧгӧр олӧм;
Турун-нянь эштӧдӧм; юяс и вӧръяс, —
Быдтор зэв муса мем! Мегыръяс, гӧръяс...

Радейта гумладор, тыр кольта вартӧм,
Радейта тӧлӧдчӧм, мешӧкъяс катлӧм;
Косьтысьӧм, весасьӧм, мельнича-н изӧм;
Заводӧ уджавны тӧв кежлӧ гижсьӧм.

Радейта няръясьӧм, нирасьӧм, печкӧм,
Ректасьӧм, быдмасьӧм, пансьӧм да летчӧм;
Челядьлысь рытъясын анягур сотӧм;
Пон увтӧм, мӧс баксӧм, рудзӧг нянь кӧтӧм...

Радейта вӧралӧм, лэч туйӧд кыйсьӧм;
Субӧта корӧсьӧн чӧскыда пывсьӧм;
Бӧрдӧм кӧть сералӧм, став олӧм-мырсьӧм;
Сынасьӧм, зуасьӧм, тоясьӧм, шырсьӧм...

Радейта лыддьысьӧм комилысь рочӧн;
Радейта быглялӧм вӧсньыдик сӧчӧн;
Сарайын ид чирсӧм, кыз шыдӧс тойӧм...
Асывводз праздникӧ пӧсь шаньга сёйӧм.

Радейта унатор ас чужан муысь!
Радейта сэтшӧма, — ог вермы шуныс.
(Радейтны быдӧнлы ас му, дерт, колӧ.)
Медъёна радейта горт сиктын олӧм:

Гажа, кор гудӧкӧн ворсӧны зонъяс;
Лӧсьыд, кор посводзын зыньгӧны номъяс;
Мича, кор ва дорын сьылӧны нывъяс;
Муса, кор кылан тэ бур коми кывъяс!