МЕНАМ СЬЫЛАН


Ягын ветлігӧн зэв гажа, бур лов вылын.
Енэж — сись кодь пожӧм йывъяс сывйын.
Гӧлӧс шыяс — йӧлӧгаӧн ылын.
Дзормӧм нитшкӧ вӧйласьӧмӧн сьыла.

Лунӧй менам быттьӧ помтӧм сьылан.
Сьӧлӧм тіпкӧмкӧд пыр сійӧс кыла.
Ньӧжйӧник да кокни шыыс сылӧн.
Мукӧддырйи — гора, зэлыд, мыла.

Асывнас зэв кыпыд менам сьылан,
лунбыд вежласьӧ, кыдз олӧм-вылӧм.
Сэсся гажтӧмтчӧ, кор рӧмдӧ ывла.
Вой ув кадӧ небзьӧ, вӧтын сылӧ...

Козьнала ме сьыланъясӧс нывлы,
Кокниджык мед вӧлі овны сылы.
Гашкӧ, сьӧлӧмӧй оз чорзьы сыла,
мыйла асывсянь да рытӧдз сьыла.