АЙӦКӦД СЁРНИ


Трактсянь гортӧ лэччигӧн
кежавла крест дорӧ.
Муӧдз копыр сетӧмӧн
тэнсьыд прӧща кора.

Айӧ, мыйкӧ кылан-он
сэні, кыз му улын?
Висьтав меным, мыйла нӧ
олысь быдӧн кулӧ?

Мамӧлы лёк ӧтнасӧн,
пыр на бӧрдӧ горӧн.
А тэ, айӧ, вӧтъясын
гӧсьт моз сӧмын волан.

Керкаын ни кызӧктӧм,
очсалӧм ни корскӧм.
Некод оз ворс гудӧкӧн.
Оз кыв бедьлӧн котшкӧм.

Он нин горӧд ружтӧмӧн:
«Лиза, чайсӧ пузьӧд!»
Киад стӧкан кутӧмӧн
он сёй кампет гусьӧн...

Трактсянь гортӧ лэччигӧн
кежавла крест дорӧ.
Муӧдз копыр сетӧмӧн
тэнсьыд прӧща кора.