СЬӦД ПОН ЙЫЛЫСЬ БАЛЛАДА


Тэ локтін сэк, кор лымйыс эз на сыв,
но шонді ворсӧдчис нин небыд нюмӧн.
Тэ, коньӧр, чотін, кынтӧм пель эз кыв,
ныр-вомыд няйтӧссьӧма, быгзис люӧн.

Дерт, тӧвбыд тшыгъялӧмыд — лы да ку,
зэв нора видзӧдісны вазьӧм синъяс.
Сьӧд понмӧй, олышт тані, он жӧ кув!
Ми вердам тэнӧ, содтам тэнсьыд вынъяс.

Сэк тӧкӧтьӧ эн ньылышт сёян доз
да сӧстӧм васӧ горша ырскин-юин.
Эн котӧрт водзӧ мукӧд понъяс моз,
а миян дзиръя дорын овны шуин.

Тадз град йӧр бердын олін гожӧмбыд
да локтысь-мунысьясӧс зіля увтін.
Ньӧж, яндысьӧмӧн матыстчин быд рыт,
мед тэнӧ малыштім да вердім-удім.

Тэ ворсін кычи моз, тэд мусмис мач.
Эн дӧзмы виччысьны, кор мунлім карӧ,
и колльӧдлін, и паныдавлін скач,
тшӧтш тӧдтӧм понъяс вылӧ увтчин яра.

Тэ чайтін, мый оз помась гажа кад,
но войвыв гожӧмыс ӧд дженьыд овлӧ.
Лым вежис зэрсӧ, кынтіс, кушмис сад,
и ӧні карса шоча сиктӧ волӧ.

Тэ виччысян на, мугов синма пон,
сьӧд мылькйӧн дзиръя дорын ӧтнад куйлан.
Тэ эбӧссялін, лоин зумыд, ён,
и шудтӧ ассьыд корсьны регыд мунан.