МАЙ

Май — садьмӧм видзьясӧн,
мичаммӧм кыдзьясӧн,
сьӧдасьӧм муясӧн
да косьмӧм туйясӧн.
Зэръясӧн, шоръясӧн,
медводдза коръясӧн,
пысталӧн дзользьӧмӧн,
сьӧд рака воӧмӧн.

Май — мелі шондіӧн
вӧр-васӧ шонтӧмӧн,
сьӧлӧмӧ — ньӧвъясӧн,
невеста льӧмъясӧн,
вижъюрлӧн ловзьӧмӧн
да юяс воссьӧмӧн,
школаӧ ветлысьлӧн
медбӧръя тӧлысьӧн.

Май — гажа пӧраӧн,
оланпас дӧраӧн,
ставыскӧд ладмӧмӧн
да буртор артмӧмӧн,
Победа лун лолӧн,
парадлӧн воськолӧн,
салютӧн, шаръясӧн
сиктъясын, каръясын.