МЕДБӦРЪЯ СУД

Кодыр локтас Суддя Суд вылӧ, став анделъяскӧд и став святӧйяскӧд, став пророкъяскӧд и став херувимъяскӧд, став серафимъяскӧд, став небеснӧй силаяскӧд, а сэки гымыштас да и чардыштас, лёкпырысь да стракпырысь, югыда и лэчыда. Му и небеса пондас дрӧжжитны. Шонді, и тӧлысь, и кодзувъяс киссясны. Небеса пондас би йылын сюмӧд моз чукрасьны. Кодыр локтан, Енмӧй, му вылад, Тэнад Славаысь дрӧжжитӧ. Сійӧ тані жӧ би ю Суд водзвылад, книгаяс воссяласны. Гуся делӧяс кыпталӧ да висьталӧ, сэки видз менӧ куслытӧм биысь. Инды менӧ аслад веськыдвылӧ сувтны. Суддяӧй праведнӧйӧй, кодыр локтас Суддя Суд вылӧ аслас Славаӧн, и став святӧйяскӧд, став анделъяскӧд, сэки пуксяс аслас Престол вылӧ. Нёль анделъяс мӧдӧдас. Мӧда-мӧдныслы дзирдалӧны. Первой андел трубитас, лыяс пондасны ӧтлаасьны. Мӧд андел трубитас, гӧнъяс пондасны йитчавны. Коймӧд андел трубитас, дзоньӧсь лоасны, гортӧ пуктӧм кодьӧсь. Нёльӧд андел, главнӧй начальник трубитас, небеса и му пондасны дрӧжжитны. Быд кулӧм мортлы труба гӧлӧс кылас. Горт вевтъяс воссяласны: «Чеччӧй, тіянӧс чуксалӧны Суд вылӧ. Мый бурӧс вӧчлінныд, рӧщӧт пӧлучитӧй. Мый лёкӧс вӧчлінныд, ӧтвечайтӧй!» Исус Кристос ассьыс рӧспинайтчӧм крестсӧ анделъяскӧд мӧдӧдас. Воздух вылӧ сувтӧдасны. Праведникъяс чеччасны, кыдзи шонді, пондасны дзирдавны. Грешникъяс чеччасны, кыдзи змейлӧн и сӧтаналӧн, чужӧмыс. Праведникъяс и аддзасны воздух вылысь Исус Кристослысь и крестсӧ. Ыджыда возрадуйтчасны и возвеселитчасны. Грешникъяс и аддзасны и крестӧс. Курыда бӧрддзасны: «Пӧгиб лоас миянлы. Ми не толькӧ Кристосӧс мустӧмтім да мучитім, дажӧ и веруйтысьястӧ мустӧмтім и мучитім. Гӧраясӧй и изъясӧй, уськӧдчӧй миян вылӧ. Медым эськӧ ми Престол вылын пукалан Суддяӧс ог аддзӧй! Проклятӧй менам батьӧй и мамӧй! Проклятӧй менам вежайӧй! Мыйла менӧ абу велӧдлӧмаӧсь! Проклятӧй менам суседӧй. Мыйла менӧ абу велӧдлӧмаӧсь!» Кодыр Исус Кристос аслас Престол вылас пуксяс, сэки ыжъясӧс веськыд ки вылас и сувтӧдас, а кӧзаясӧс шуйга ки вылас.

Веськыд ки вылын сулалысьяс дінӧ бергӧдчас, рампырысь горӧдас: «Локтӧй, тіянлы гӧтӧвитӧма менам Батьлӧн Му пуксьӧмсянь Сарство Небеснӧй. Кодыр вӧлі кынӧмӧй сюмалӧ, вердлінныд. Кодыр вӧлі горшӧй косьмӧ, юкталінныд. Кодыр вӧлі пасьтӧм, и пасьтӧдінныд. Кодыр вӧлі больничаын, и служитлінныд. Кодыр вӧлі тюрмаын, и видлінныд. Кодыр вӧлі шог-печальын, радосьт вӧчлінныд!» Сэки праведникъяс и шуасны: «Господьӧй, Владыкаӧй, кодыр ми тэнӧ тшыг дырйиыд и вердлывлім? Кодыр ми тэнӧ горш косьмигад юктавлім? Кодыр ми тэнӧ странникӧн и примитлім? Кодыр ми тэнӧ пасьтӧм дырйиыд пасьтӧдлім? Кодыр ми тэнӧ больничаын служитлім? Кодыр ми тэнӧ тюрмаын и видлывлім? Кодыр ми тэнӧ шог-печаль дырйи радосьт вӧчлывлім?» Господь налы рампырысь горӧдас: «Коді ачыс омӧль вӧлі, налы и вӧчлінныд, меным вӧчлінныд!»

Шуйга ки вылын сулалысьяс дінӧ бергӧдчас. Лёкпырысь горӧдас: «Мунӧй ме дінысь, проклятӧйяс, вечнӧй куслытӧм биӧ. Медым ме синмӧн ог аддзы. Кодыр вӧлі кынӧмӧй сюмалӧ, энӧй вердлылӧй, кодыр вӧлі горшӧй косьмӧ, энӧй юкталӧй, кодыр вӧлі странникӧн, энӧй примитлӧй, кодыр вӧлі пасьтӧм, энӧй пасьтӧдлӧй, кодыр вӧлі больничаын, энӧй служитлӧй, кодыр вӧлі тюрмаын, энӧй видлылӧй, кодыр вӧлі шог-печальын, радосьт энӧй вӧчлылӧй!» Сэки грешникъяс горӧдасны: «Господьӧй, Владыкаӧй! Кодыр ми тэнӧ тшыг дырйи аддзылім, кыдз тэ эскин, тэнӧ эгӧй вердлылӧй? Кодыр ми тэнӧ горш косьмигад аддзылім, кыдз тэ эскин, тэнӧ эгӧй юкталӧй? Кодыр ми тэнӧ странникӧн аддзылім, кыдз тэ эскин, тэнӧ эгӧй примитӧй? Кодыр ми тэнӧ пасьтӧм дырйи аддзылім, кыдз тэ эскин, тэнӧ эгӧй пасьтӧдлӧй? Кодыр ми тэнӧ больничаын аддзылім, кыдз тэ эскин, тэныд эгӧй служитлӧй? Кодыр ми тэнӧ тюрмаысь аддзылім, кыдз тэ эскин, тэнӧ эгӧй видлылӧй? Кодыр ми тэнӧ шог-печаль дырйи аддзылім, кыдз тэ эскин, тэныд радосьт эгӧй вӧчлылӧй?» Господь налы лёкпырысь горӧдас: «Коді ачыс омӧль вӧлі, сійӧ менам дзоля вок вӧлі. Налы энӧй вӧчлылӧй. Меным энӧй вӧчлылӧй!» Праведникъяс мунасны вечнӧй олӧмӧ. А грешникъяс мунасны вечнӧй куслытӧм биӧ. Анделъяс зырӧдасны кисӧ-коксӧ, дорасны, вечнӧй куслытӧм биӧ шыблаласны. Сэні налы пом волытӧм печаль лоӧ, пом волытӧм мученньӧ. Пом волытӧм и синва.