ВӦЛІ ЧӦСКЫДӦН КОМИ СУР


Юмысь вийӧдӧм, чӧскыд да бур
Важӧн юлӧмны комияс сур,
Ӧні юӧны вина да водка,
Налысь кӧрсӧ тӧдліс-ӧ кодкӧ?

Лои кодалысь сиктын со тыр
Вина-водкаыс некыдз оз быр,
Сійӧ киссьӧ кӧть вомӧ нин шорӧн,
Юысь дугдывтӧг юансӧ корӧ.

Абу жаль водка доз вылӧ нинӧм,
Мед кӧть ёна нин сюмалӧ кынӧм,
Юысь вузалас керкасьыс ставсӧ,
Медым кымлавны век курыд васӧ.

Мед кӧть гӧтырыс сы дорысь мунӧ,
Верӧс винаӧ нырсӧ пыр сунӧ,
Сылы некоді ӧні оз ков,
Вина «гагйысь» мортыд оз пов.

Важӧн сикт шӧрын некод эз кодав,
Вӧлі яндзим, он кӧ тэ уджав,
Ӧні уналы уджавны дыш,
Юысь оз кӧсйы пӧсьӧдны мыш.

Вина-водкаыс лавкаын тырыс,
Оз ӧд эскыссьы, мый сійӧ бырас,
Курыд васӧ он жӧ тай бырӧд,
Сӧмын олӧмас эскӧмыд бырӧ.

Вына вӧлӧма ас вӧчӧм сур,
Ӧні некытысь сійӧ оз сюр.
Кӧть и юлісны комияс сур,
Но эз янӧдны ассьыныс юр.