ЫТВА ДЫРЙИ


Ыджыд ӧдӧн, гажа зыкӧн воис тулыс,
Восьтіс юяс, мездіс тыяс кӧдзыд йиысь,
Ылӧ-ылӧ дыр кад кежлӧ вӧтліс тӧлӧс,
Мороз пӧльлӧн ыджыд вомыс лои пӧлӧс,
Еджыд тошкыс Кӧдзыд пӧльлӧн ӧдйӧ сылі,
Ыджыдалӧ талун тулыс, сьылӧм кылӧ.
Видзьяс, вӧръяс, увтасінъяс — ставыс ваын,
Кыдзьяс, бадьяс келалӧны «рӧмпӧштанын».
Позйысьӧма лэбач котыр: юсь да дзодзӧг,
Оз тай сувтлы олӧм ньӧти, мунӧ водзӧ.
Шонді азыма зэв сёйис лымсӧ-йисӧ,
Ӧні кынӧмыс тай сылӧн ёна висьӧ.
Меным нимкодь, сэтшӧм долыд, ёна бур
Тувсов кадӧ ытва дырйи юа сур.