НЫЛӦЛЫ


Дона нылукӧй, мусаӧй менам,
Мича оз тусьӧй, дзолюкӧй менам,
Тэ ӧд, нылукӧй, медся мен колана,
Тэкӧд, дзоридзӧй, дырджык ме ола на.

Тэкӧд, зарниӧй, шудаджык олӧмӧй,
Тэкӧд радлунӧн тыр менам сьӧлӧмӧй,
Тэнӧ радейта ме медся ёна ӧд,
Тэныд вӧча ме ставсӧ, мый верма ӧд.

Муса нылукӧй, ло жӧ тэ шудаӧн,
Мывкыднад, сямлуннад — вынаӧн,
Олан туйӧдыд восьлав тэ зумыда,
Шуштӧм лунъяссӧ паныдав кыпыда.