ВЫЛЬ ТУЙ ВЫЛӦ

Сюсьджыка, вокъясӧй, чеччӧй!
Кось вылӧ мунамӧ пыр!
Озырлы, лёклы ог сетчӧй,
Комилӧн вын эз на быр!

Дыр нин ми синваяс кисьтам,
Ёна нин юкалӧ мыш.
Кабакӧд ветлыны письтам.
Тӧдам роч сюзьлысь ёсь гыж!

Дыр нин ми узигтыр олам,
Ен вылӧ ыстысям пыр,
Керысьысь, шеваысь полам;
Йӧйлунӧн олӧмным тыр.

Тӧдлытӧг дорӧма-сь ёна
Миянӧс тшыглун да шог...
Велӧдчӧм, вокъяс, меддона!
Велӧдчам — аддзам ми мог!

Вӧлись сэк син водзным воссяс,
Аддзам сэк озырлысь лэч;
Джевкнитам ставсӧ, мый кутӧ,
Долыда овны оз лэдз!

Кыпӧдчӧй, коми йӧз, чеччӧй!
Сьӧлӧмын пуӧ нин вир.
Озырлы, лёклы эн сетчӧй,
Кось вылӧ мунамӧ пыр!