БУРСИӦМ

Шог босьтлӧ, рочасьӧ кор коми,
Кӧть пыдди пуктам ми роч кыв.
Мед эськӧ олӧма и, том и
Эз кедзовт коми сьыланкыв.

Мед чужисны на комияслӧн
Выль Виктор Савин, Тима Вень.
Мед радуйтісны гижӧдъясӧн
Выль Юхнин Вась, выль Юшков Гень.

Эм Игушев Е., Е. Цыпанов —
Зэв ылӧдз нималана йӧз.
Быд сёрни джуджыд наӧн панӧм,
Быд гижӧд — коми вӧсна тӧжд.

Мед юргис коми кывным водзӧ
Да пидзӧсчань вылас эз усь,
И югзис кыдзи-й юрйыв кодзув
Да сы моз нэмъяс чӧж эз кус.

Жаль, чина коми кутіс бырны,
Морозов, Панев коддьӧм кӧн?
Ляк баддьӧн му-видз кутіс тырны,
Сю пыдди ыбын быдмӧ йӧн.

Вужвойтыр сьӧлӧмын век ӧзйы
Ас муӧс радейтана би.
Ме абу вуджӧр коми йӧзлӧн,
Ме — коми нациялӧн пи.

Ас чужан муын колим китыр,
Кузь нэм тэ, Енмӧй, ставлы сет!
Ме — коми Васька Ёгор Виктор,
Ме — коми войтырлӧн поэт.