БАРА АДДЗЫСИМ...

Бара аддзысим, бара сывъясьлім...
Тӧдам донсӧ ми прӧстӧй кывъяслы.
Сьӧлӧм мыйлакӧ пессьӧ ӧдӧба,
Мый нӧ сулалам? Водзӧ мӧдамӧ.
Ой ті, ёртъясӧй, ой, землякъяс ті,
Вай жӧ шӧйтыштам Изьва ягъясті,
Сэсся ветлыштам Изьва ю бокті,
Выль частушка мед отсӧ юковтӧ,
Мед нӧ яг йылыс радлӧ кыалы,
Радлӧ югыдлы — сійӧ шыалӧ.
Миян нэм йылысь ягъяс сьылӧны,
Шудсӧ найӧ ӧд сідз жӧ кылӧны.
Ок, и паськыд жӧ миян Рӧдина,
Чужаніныд жӧ век тай ӧти на.
Мортлы овнысӧ ӧтчыд сетӧма.
Ӧткодь гаж пуӧ тан и, сэтӧн и.
Оз кӧ овлы морт аслас нимтӧгыс,
Оз и овлы морт чужанінтӧгыс.
Нимкодь миянлы, ёртъяс, ветлыны,
Мый и татшӧм край эм бур свет вылын.