ЧУКСАЛӦ КОДӦСКӦ ГУДӦК

Бара кывтӧ лӧз ю весьтті ру,
Бара кодӧскӧ чуксалӧ гудӧк.
Кыв ни джын Матрен пӧчӧ оз шу,
Сійӧс гажӧдӧ ныв-зонлӧн шудыс.

Восьса ӧшинь. И жугыльтчис пӧч.
Важлӧн дой аслыс ин бара корсис.
Татшӧм тувсовъя рытӧ жӧ стӧч
Матрен пӧчӧлӧн пи коркӧ ворсіс.

Ворсіс, гажӧдіс веж нӧрыс йыв,
И эз вӧвлы сэн ныв-зонлы дзескыд.
Вӧлі на пӧвстын дзик ӧти ныв,
Кодлы гаж вӧлі быттьӧкӧ веськодь,

Кодӧс асъядор ӧтнассӧ нач
Гудӧк колльӧдіс ордымлӧн визьӧд.
Мирнӧй му вылӧ локтіс война,
Муніс зон шудсӧ бойясын видзны.

Дона мам дорӧ пи бӧр эз лок.
Куйлӧ гудӧкыс лабичын, ӧтка.
Пӧчлысь сьӧлӧмсӧ чепӧльтлас шог,
Сэсся пӧч ковтӧм синвасӧ вӧтлас.

Усис пи. Сэсся некод эз коль.
Лоӧмторйыскӧд мый сэсся вӧчан?
Пӧчлысь ним новлӧ кымынӧд во,
Кӧть и некодлы шунысӧ пӧчӧн.

Сійӧ пукалӧ, кывзӧ. И нюм
Сылысь ловзьӧдӧ гудӧклӧн горыс.
Югдӧ вочасӧн пӧрысьлӧн дум.
Ачыс — матӧджык важ ӧшинь дорӧ.

Кыв ни джын Матрен пӧчӧ оз шу.
Кутшӧм мусаӧсь муыс, веж лудыс!
Йӧв кодь кывтӧ лӧз ю весьтті ру.
Ворсӧ, чуксалӧ кодӧскӧ гудӧк.