КУСӦД ЛӦГТӦ, КУСӦД

Катшашыдӧс серлӧдлӧ нин мусӧ.
Жугыль пӧра тӧдса мен и тэд.
Мусаӧй, вай кусӧд лӧгтӧ, кусӧд,
Он ӧд первой лун тэ менӧ тӧд.

Аддзысим эг йӧктанінын тэкӧд,
Кӧть и йӧктанін ог омӧльт, ог.
Аддзысим: кер пӧрӧді ме сэки,
Кор тэ увйин пуяс, сотін ёг.

Кӧдзыдысла шонді нюмдіс дыша,
Любӧ сылы вӧлі вӧртас сай.
Пӧсялісны уджысь миян мышъяс —
Ру эз прӧста мышъяс вылысь кай.

Восьтіс парма миянлы быд ордым:
Шудсӧ сылы асьным вайим ми,
Гӧрддзасис кӧ муслун сэки кортӧг,
Оз куж разьны сійӧс весиг ки.

Катшашыдӧс кӧдзӧ локтысь тӧлыс,
Кодлы тані бара овны дыр,
Кытчӧдз таръясыс оз панны кӧлысь,
Кытчӧдз Яг ю керйӧн оз ло тыр.

Мунам клубӧ — пӧч сэн талун йӧктӧ.
А ӧд кызь вит арӧн мен и тэд.
Мусаӧй, вай кусӧд ассьыд лӧгтӧ,
Он ӧд первой лун тэ менӧ тӧд.