ПАРОХОД «МИХАИЛ ШОЛОХОВ»

Лӧз Войвыв гордитчӧ
			Россиялӧн пиӧн.
Оз гӧнит рысак моз,
			кӧть Дон вылысь сійӧ.
Но гыяссӧ лэптӧ
			да берегӧ йӧткӧ,
Лӧнь Донса казаклӧн
			кыдз сьӧлӧмыс тшӧктӧ.
Кыдз сьӧлӧмыс тшӧктӧ,
			кыдз сьӧлӧмыс корӧ.
Выль рӧмъяссӧ сы водзӧ
			восьтӧ Печора.
А туй абу дженьыд,
			а туй абу кокни —
Кузь пуръясӧн
			ылі причал дінӧ локны.
Причал дінӧ локны —
			выль рейсъясӧ вуджны.
Сьӧд вой ли, сӧдз асыв —
			пыр уджын, пыр уджын.
Ог шу ме, мый мудзлун
			оз сибав сы дінӧ.
Но, ньылӧмсӧ чышкытӧг,
			медджуджыдінӧд
Пыр шлопӧдӧ-мунӧ.
			И нимкодь сэк аслыс,
Бур кылӧн кӧ кодкӧ
			тат кывтӧмсӧ пасъяс.
Оз тӧд Донса степыс,
			оз тӧд еджыд войяс.
Тан тувсов вой
			мунысьлы югыдсӧ койӧ.
Кыдз правдалысь кыв,
			кодӧс радейтӧ сійӧ,
Тан лун шӧрыс кыӧ
			пӧсь, зарниа сіяс.
Тан бипурйыс со
			чери кыйысьлӧн ӧзйӧ,
Казаккӧд пӧсь юкваӧн
			юксьыны кӧсйӧ.
Казак водзын сюрнас
			тан ышнясьлӧ лола,
Код рытнас ю дорӧ
			горш веськӧдны волӧ.
Веж пожӧм, кӧть тшап,
			мыйкӧ вашкӧдӧ сылы.
И менам, кор аддза,
			друг жугыльлун сылӧ.
Кузь мачтаыс йылын
			флаг — кыалӧн рӧма,
Но кыа моз флаг би
			оз кус некор сӧмын.
Та флаг улын вундӧ
			Печоралысь васӧ,
Та флаг улын
			славитӧ мортлысь судьбасӧ.